Абаттандыру
Өткен аптада Семей қаласының әкімі Бақытжан Байахметов 4-Омская, 5-Омская көшелерінің бойындағы жөндеу жұмыстарының барысымен танысты.
Әр көшенің ұзындығы шамамен 600 метрді құрайды. Мұнда көшелер ірі қиыршық және құм қиыршық тастармен толтырылған. Жұмысқа 8 КамАЗ, 2 грейдер және 1 каток тартылды. Мұнда күн сайын 30-ға жуық машина жабын материалын жеткізеді. Бұл көшелердегі жұмыстар бір-екі күнде аяқталуға жақын. Содан кейін Беляков көшесінде грейдерлеу жұмыстары басталады.
Жалпы, Семей қаласының 35 көшесінде әр түрлі құрылыс бригадалары жұмыс атқаруда. 15 көшенің құрылысы аяқталды. Қазіргі уақытта Молдажанова және Аккульская көшелерінде жол техникасы жұмыс істеуде.
Омская көшесінің тұрғындары қала әкімінен арық жүйесін ойластыруды өтінді, өйткені бұл батпақты жер және көктемде қар ерігеннен кейін су көп жиналады.
Бақытжан Байахметов Омская және Толстой көшелерінің жарықтандырылуына да назар аударды. Қазірдің өзінде онда тіректер мен сымдар бар. Тек ұзақ уақыт жөндеу жұмыстарының жүргізілмеуіне немесе шамдардың жанып кетуіне байланысты жарық жоқ. Қала басшысы тұрғын үй-коммуналдық шаруашылық бөлімі мен «Горсвет» мекемесіне жағдайды тексеріп, аталған көшелерде жарықтандыруды қамтамасыз ету шараларын қабылдауды тапсырды.
Қала әкімі сондай-ақ Чайковский көшесі тұрғындарының бастамашыл тобымен кездесті. Мұнда көше жарығын орнату жұмыстары аяқталды. Семейдің орталық аудандарының бірінде орналасқан бұл кең көше бұрын — соңды жарықтандырылмаған.
«Горсвет» мекемесінің мамандары қала әкімінің тапсырмасымен Чайковский көшесіне 41 тірек пен 37 шамды бекіткіш орнатты. Морозов көшесіне дейінгі ұзындығы бір шақырымнан асатын көшеде 74 шам қойылған. Тұрғындар өткен кездесулердің бірінде көшені жарықтандыруды сұраған болатын. Кездесуде қала тұрғындары әкімге атқарған жұмыстары үшін алғыстарын білдірді.
Чайковский — Шәкәрім көшелерінің қиылысында орналасқан үйдің тұрғындары көп пәтерлі тұрғын үйлерді күрделі жөндеудің мемлекеттік бағдарламасы есебінен үйдің қасбетіне жөндеу жұмыстарын жүргізуді және есептеуді дұрыс жүргізу үшін кәсіби мамандарды жіберуді өтінді.
— Бұл — ескі үлгідегі үй, сондықтан арнайы құрылыс және бояу материалдарын пайдалану қажет. Бірақ сіздер алдымен мұндағы тұрғындардың кемінде 75 пайызының келісімін жинауларыңыз керек. Осыдан кейін шатырды алуға және сметаны дайындауға кірісуге болады,- деді қала әкімі Бақытжан Байахметов.
Тұрғындардың бастамашыл тобы сондай-ақ Чайковский көшесіндегі 4-ші және 6-шы үйлердің ауласындағы балалар алаңын жаңарту мәселесін де көтерді. Көлік мәселесі де бар. Аулаға кіреберісте тыйым салу белгілері болғанына қарамастан, кейбір көліктер ауладан тікелей өтеді.
Қала әкімі Бақытжан Байахметов ТҮКШ бөліміне тұрғындардың барлық мәселелерін зерделеп, жөндеу жұмыстары бойынша ұсыныстар дайындауды тапсырды. Сонымен қатар келесі жылдың бюджетіне енгізу үшін ауланы абаттандыру құны да есептелетін болады.
Семей қаласы ішкі саясат бөлімінің ақпараты негізінде әзірленді
