Ресми сапар
Шығыс Қазақстан облысының әкімі Даниал Ахметов Семейге жұмыс сапарымен келіп қайтты. Іссапар барысында аймақ басшысы Қарағайлы шағын ауданындағы әлеуметтік құрылыс және тұрғын үй нысандарымен танысты. Бұл күні Даниал Кенжетайұлы Комсомол кентінде де болып, 14 отбасыға жаңа пәтерлердің кілттерін табыстады.
Бүгінгі таңда Қарағайлы шағын ауданында жалпы ауданы 173 мың шаршы метр болатын 32 көп пәтерлі үй салынды. Сонымен қатар тағы 31 көп пәтерлі үйдің құрылысы жүріп жатыр. 2233 пәтер шамамен 10 мың адамға есептелген. Келесі жылы Қарағайлыдағы 1200 орындық мектеп құрылысына қаражат бөлінеді. Қажет болған жағдайда, болашақта мұнда екінші мектеп салынады.
Жалпы, 2020 жылы қалада 196 мың шаршы метр тұрғын үй салынды. Биыл 215 мың шаршы метр тұрғын үй салу жоспарланған.
— Кеңес заманында бүкіл Семей облысындағы құрылыс көлемі 140 мың шаршы метрден аспады. Біз осы жерде құрылысты бастаған кезде, бұл істің біздің қолымыздан келетініне ешкім сенбеді. Ал қазір Қарағайлыдағы тұрғын үйлерге деген сұраныстың артқанын көріп отырмыз. Мен Семейдегі құрылыстың жоғары қарқынын, мәдениет пен әлеуметтік саланың басқа да деңгейін көріп отырмын, — деді Шығыс Қазақстан облысының әкімі.
— Келесі жылы бір мектептің құрылысы аяқталғаннан кейін маған есеп беріңіз, екінші жарты жылдықта тағы бір мектептің құрылысын бастауға болады. Сондай-ақ мұнда заманауи Теннис орталығы мен Мұз сарайы салынады, — деп атап өтті Даниал Ахметов.
Бұдан кейін облыс басшысы «35 квартал», «Орталық» қазандығы және «103» – «103 А» қазандықтарының жұмыс барысымен танысты. Қазандықтарда жөндеу жұмыстары жүргізіліп, нәтижесінде көмір айтарлықтай үнемделді. Сонымен қатар жұмсалған отынды жалған түрде есептен шығаруға мүмкіндік жоқ. Сондай-ақ қосымша тағы да қазандықтар бар, бұл жазғы дайындық жұмыстарының нәтижесі, — деді облыс әкімі.
Дегенмен барлық қазандықтарда жабдықтар ескірген. Жылдан-жылға оларды жөндеуге бюджеттен қомақты қаражат бөлінеді. Облыс әкімінің айтуынша, бұл дұрыс емес. Бір ескірген жабдық екіншіге ауыстырылады. Бұл тиімсіз, сонымен қатар ауаға зиянды шығарындылар мәселелері де шешілмейді.
— Ескі қазандықтар – бұл анахронизм. Семей қаласының әкімі Бақытжан Байахметов пен тиісті мамандар қазандықтар бойынша әлемдік технологияны зертеп, зерделеуі керек. Қазандықтарды қайта жөндеуді тоқтатуымыз керек. Біз өте ескі жабдықты ескіге ауыстырамыз. Бұл ештеңе бермейді. Бүкіл әлем бұрыннан бері басқа жабдықтармен жұмыс істеп келеді. Біз бұл міндетті концептуалды түрде шешуіміз керек, — деді Даниал Ахметов.
Бұдан кейін облыс әкімі Шәкәрім даңғылы мен Шоқан Уәлиханов көшесінің, Дулатов көшесі мен Шәкәрім даңғылының қиылысындағы оң жақ бұрылыстардың құрылысымен танысты.
Бұл күні аймақ басшысы Комсомол кентіндегі «Бір қабатты Шығыс» бағдарламасы бойынша салынып жатқан құрылыс жұмыстарының барысымен де танысты. Мұнда барлығы 73 үй (147 пәтер) бой көтерген. Осы күні Комсомол кентінде 14 отбасы жаңа баспанаға ие болды. Олардың арасында әскери қызметші Медғат Берекболов, мұғалім Марья Сыбанғалиева, медбике Назигүл Дәуітова және басқалар бар. Жаңа пәтерлердің кілттерін Даниал Ахметов табыс етті.
— Өмірде көптеген қуанышты оқиғалар болады. Бірақ өз баспанаңа ие болу ерекше есте қаларлық сәт. Бұл — кез келген отбасы үшін үлкен оқиға. Екі тамаша мереке – Тұңғыш Президент күні мен Тәуелсіздік күні қарсаңында мен сіздерді қоныс тойларыңызбен құттықтаймын! Бақытты болыңыздар!- деп жылы лебізін білдірді Шығыс Қазақстан облысының әкімі.
Одан кейін Даниал Ахметов «Семей қаласының перинаталдық орталығы» ШЖҚ КМК базасында Балаларды оңалту және ерте араласу орталығын ашуға дайындық жұмыстарымен танысты.
Аталған орталық Нұрсұлтан Назарбаев қоры жанындағы «Қамқорлық қоры» корпоративтік қорының қолдауымен салынды. Мұнда жыл сайын 3 жасқа дейінгі 1500 бала медициналық оңалтудан өте алады.
Орталық Семей қаласынан, Абай, Аягөз, Бесқарағай, Бородулиха, Жарма, Үржар аудандарынан, сондай-ақ Курчатов пен Шар қалаларынан пациенттерді қабылдауға есептелген.
Негізгі медициналық құрал-жабдықтар қор есебінен орнатылды. Тиісті кадрлар жинақталып, мамандар да қор есебінен оқытылды.
Бұл орталық 14 желтоқсанда ашылады деп жоспарланған.
Семей қалалық ішкі саясат бөлімі мәліметі бойынша әзірленді
