Семей
Семей қаласының әкімі Бақытжан Байахметовтің шаһар тұрғындарымен кездесулері жалғасуда. Қала басшысы бұл жолы Затон ауданы тұрғындарының бастамашыл тобымен жүздесті.
Кездесу барысында аталған аудан тұрғындары Бақытжан Кәкенқажыұлына түйткілді мәселелерін жеткізді. Олардың айтуынша, аудандағы бірнеше көше жөндеуді қажет етеді, жарықтандыруды да ретке келтіру қажет, сондай-ақ қоғамдық көліктерге қатысты мәселе бар. Жергілікті халық қала басшысына жер асты суынан да қауіптенетіндерін жеткізді.
— Шағын аудандарға да назар аударып жатырсыз. Қала халқының саны артып келеді. Бұл көшеге асфальт төсеп, тоғайларды кесу қажет. Жарық бар. Балалар 18-ші мектепке барады. Балалар үшін жарықтандырылған көшемен жүру ыңғайлы әрі қауіпсіз болады, — дейді бастамашыл топ мүшесі Боранбай Бегатов.
Жоғарыда аталған — Мәннан Тұрғанбаев көшесі. Онда жарықтандыру бар, ендігі кезекте жолды және оған жапсарлас бірнеше көшелерді де ретке келтіру қажет.
Бақытжан Кәкенқажыұлы жолаушылар көлігі және автомобиль жолдары бөліміне осы аудандағы 5 көшені тегістеуді және құм-қиыршық тас қоспасы мен қиыршық тас төсеуді тапсырып, бұл жұмыстың жыл соңына дейін аяқталуы тиіс екенін атап өтті.
Айта кетейік, үш жыл бұрын мұнда су ағысы бойынша инженерлік шешім қабылданған болатын. Коломенская көшесі жағынан жер асты сулары, ал Железнодорожный көшесінің бойымен су Шығыс кентіне қарай ағады. Көктемде су тасқыны болуы мүмкін. Сондықтан жаңа технологиялық шешім қабылдау қажет. Бұл мәселе жұмыс тобының бір отырысында егжей-тегжейлі қаралмақ.
Тұрғындар сондай-ақ жылыту мәселесі туралы да айтты. Шағын ауданда бірнеше автономды жылу желілері бар. Мысалы, Мирный кентіндегі №2 орта мектеп жеке қазандықпен жылытылады. Басқа да нысандар, соның ішінде тұрғын үйлер бар. Болашақта оларды жөндеу керек немесе орталық жылу жүйесіне қосу қажет.
— Мен бұл мәселе туралы бірінші рет естіп тұрған жоқпын. Затон ауданының тұрғындарынан бірнеше өтініш — хаттар келді. Хаттамалық түрде белгілеу қажет. Бұл мәселені бақылауда ұстайтын боламыз, — деді қала әкімі.
Өткен жылы Сәтбаев көшесінде су құбыры желісі ауыстырылды. Ол үшін асфальт жабынының бір бөлігін алып тастауға тура келді. Алайда желіні ауыстырғаннан кейін асфальт жабыны дұрыс қалпына келтірілмеді. Жолдың шеттері тарылды, бұл көлік қозғалысына кедергі келтіреді. Бақытжан Байахметов жолдың бұл бөлігі келесі жылы жөнделетінін айтып, уәде берді.
Семей қаласы ішкі саясат бөлімінің мәліметі бойынша әзірленді
