Өткен аптада қала әкімінің орынбасары Айдар Садырбаев қалалық ақпарат орталығында баспасөз конференциясын өткізіп, медицина, білім беру, жұмыспен қамту және басқа да әлеуметтік мәселелер жайлы сөз қозғады.
Айдар Садырбаев алдымен қаладағы эпидемиологиялық жағдайға тоқталып өтті.
— Бүгінгі таңда Семейде 234 мыңнан астам ересек адам вакцинацияланды. Бір апта бұрын жасөспірімдерді, жүкті және бала емізетін әйелдерді вакцинациялау басталды. Қалада коронавирустық инфекцияны емдеу үшін барлық жағдай жасалған. 2500-ден астам адам Pfizer вакцинасының І компонентін алды. Бүгінгі таңда жұқпалы аурулар ауруханасында 570 төсек-орын бар. Оның 110-ы қолданыста. Бұл 19 пайызды құрайды,- деген Айдар Садырбаев Тәуелсіздің күні қарсаңында Елбасының «Қамқорлық» жобасы аясында балаларды оңалту орталығы ашылатынын, жыл сайын стационарлар мен емханалардың, оның ішінде Жедел медициналық жәрдем ауруханасының материалдық-техникалық базасы жаңартылып жатқанын жеткізді.
Айдар Серікқазыұлының айтуынша, қаламызда Тұңғыш Президент күніне және Тәуелсіздік мерекесіне орай бірқатар әлеуметтік нысандардың ашылуы жоспарланып отыр. Мерекелер қарсаңында 40-қа жуық іс-шара ұйымдастырылмақ. Дегенмен эпидемиологиялық жағдай барлығын өзгертуі де мүмкін.
– Облысымыздың «жасыл» аймаққа өтуі бізге мерекеге орай бірқатар шараларды ұйымдастыруға мүмкіндік беріп отыр. 1 желтоқсан — Тұңғыш Президент күнінде және Тәуелсіздік мерекесінде бірқатар әлеуметтік нысандардың ашылуы жоспарлануда. Ұшақтар кенті мен Қарағайлы шағын ауданында пәтер кілттері табысталады. Білім беру және мәдениет мекемелерінде қосымша іс-шаралар ұйымдастырылады. 4 желтоқсанда “Астана Балет” ұжымы қаламызда шығармашылық кеш өткізбекші. Бұл – Семей үшін айтарлықтай маңызды оқиға. Алайда барлығы эпиджағдайға байланысты. Мерекелік іс-шараларды өткізу үшін ересектер ғана емес, жасөспірімдер де вакцинациядан өтуі қажет,– деді Айдар Садырбаев.
Айдар Серікқазыұлы алдағы уақытта қалада инватаксилердің саны екі есеге артатынын жеткізді.
– Мүгедектерді тасымалдау — өзекті мәселелердің бірі. Инватакси мәселесі осыған дейін де бірнеше рет көтерілгенін білесіздер. Бүгінгі таңда қалада 8 инватакси жұмыс істеуде. Қыркүйек айында қосымша екі көлік бөлінді. Біз белсенділермен және бастамашыл топтармен бірлесіп машиналар санын кем дегенде екі есе арттырмақшымыз. Алдағы жылы олардың санын 15-ке жеткізу жоспарланған. Қызмет алушылар тарапынан белгілі бір ұсыныстар бар. Біз оларды зерттеп, тиісті өзгерістер енгізуіміз керек, – деді Айдар Садырбаев.
Қала әкімінің орынбасары білім беру мекемелеріндегі қауіпсіздік шараларына да тоқталып өтті.
– Бүгінде Семейдегі 40 мектеп бейнебақылаумен қамтамасыз етілген. Күзет агенттіктерімен 42 мектеп келісім жасады. Бақылау жүйесі оқушыларымыздың қауіпсіздігін қамтамасыз етеді.Әр мектепте үйірмелер ұйымдастырылып, 204 жаңа спорт секциялары ұйымдастырылды,– деді Айдар Садырбаев.
Айдар Серікқазыұлының айтуынша, келесі жылы Шығыс және Степной кенттерінде екі мектеп ашылмақ. Бұл мектептердің жүктемесін азайтып, шалғай аудандарда орын тапшылығы мәселесін шешуге мүмкіндік береді.
Қазір қалада 60 мектепке дейінгі балалар мекемесі, 21 шағын орталық мектеп базасында жұмыс істейді. Восход, Бобровка, Қарағайлы кенттерінде болашақта төрт балабақша салу жоспарланып отыр.
Қала әкімінің орынбасары жыл басынан бері 2485 адам тұрақты жұмысқа орналастырылғанын айтты.
— Бізге 5255 адам жұмысқа орналасу мәселесімен келді. 2485 адам тұрақты жұмысқа орналастырылды. 208 адам уақытша жұмыспен, 1000-нан астам адам қоғамдық жұмыспен қамтылды. 404 жас Жастар тәжірибесіне жолданды. Жұмыссыздар жұмыспен қамту орталығына келіп, тіркелуі қажет. Орталық ол адамға келетін жұмыс орындарын ұсынады немесе қысқа мерзімді кәсіптік оқытуға жібереді. Қаламызда, негізінен, мұғалім, дәрігер, бухгалтер, менеджер сынды мамандар жетіспеушілігі байқалады,- деді А.Садырбаев.
Айдар Серікқазыұлы журналистер қойған сауалдарға жауап берді.
Ж.ТӨЛЕГЕНҚЫЗЫ,
«Семей таңы»
