Өткен жұма, 26 қараша күні Шәкәрім университетінде Семей қалалық ішкі саясат бөлімінің ұйымдастыруымен, Тәуелсіздіктің 30 жылдығына орай, «Тәуелсіздік-тұғырым» тақырыбымен ақындар айтысы өтті.
Сөз барымтасында қаламыздың азулы ақындары ел Тәуелсіздігінің 30 жылдық мерейтойын, осы жылдар ішінде жеткен жетістіктерімізді, Семейдің бүгінгі тыныс-тіршілігін жырға қосып, бір-біріне тосыннан сауал қойды. Жыр шеберлерінің өнерлеріне халықаралық конкурстардың лауреаты, облыстық филармонияның бас режиссері Серәлі Құсманұлы, Семей қаласының Жастар ресурстық орталығының директоры Олжас Соғымбай, айтыскер ақын Дәулет Сметов, ақын Қарлығаш Әділханқызы қазылық етті.
— Алаштың ақсүйек өнері, ұлттық өнерімізді дәріптеу мақсатында бүгін сіздермен қауышып отырғаныма қуаныштымын. Барлықтарыңызды алда келе жатқан Ұлы дала елінің ұлық мерекесі Тәуелсіздігіміздің отыз жылдығымен құттықтаймын! Жыл басында қалалық ішкі саясат бөлімімен бірлесіп, әдебиет пен мәдениетке, өнерге қолдау көрсету ниетімен азын-аулақ қаржы қарастырып, ауқымды шара жоспарлаған едік. Бірақ пандемия кедергісін келтірді. «Ештен кеш жақсы» демекші, жыл соңында «Қазақстан жастарын қолдау» қоғамдық қорымен бірлесіп ұйымдастырып отырмыз. Ақындарымызға сәттілік тілеймін,- деді Семей қаласының Жастар ресурстық орталығының директоры Олжас Соғымбай.
«Абай» атындағы халықаралық мәдениет пен өнерді қолдау қорының атқарушы директоры Аслан Ғафуров та ақындарға жылы лебізін білдірді.
— Ән мен жырдың бесігі, Алаштың рухани астанасы — қасиетті Семей жерінде, Абай елінде бүгін үлкен дүбірлі думанның куәгері болмақпыз. Ең алдымен осы айтыстың өтуіне мұрындық болып отырған қалалық ішкі саясат бөліміне алғысымызды білдіреміз. Мұхтар Әуезов: «Қазақтың қанына біткен екі егіз өнері бар. Бірі — қазақтың күресі, бірі — қазақтың айтысы»,- деген екен. Айтыс – қазақтың қанына біткен қасиетті өнер, сөз барымтасы.
Бүгін айтыстың алдаспанындай жарқыраған ақындар әділқазылық етіп отыр. Алла ақындарымыздың аузына шұрайлы сөз салсын. Өнерлеріңіз өрісті, еңбектеріңіз жемісті, өмірлеріңіз келісті болсын. Осында қазақ өнерін сыйлап келіп отырған жастарды көріп, көңілім толқып тұр. Сіздердей жастар барда ұлттың байрағы құламай, қаймағы бұзылмай жасай береді деп ойлаймын,- деді Аслан Ғафуров.
Сөз аламанында І орынды Айбек Жеңісқазин қанжығасына байласа, ІІ орынды Қуандық Кенжебекұлы, ІІІ орынды Мирас Зекенов пен Жасұлан Мақаев иеленіп, сыйлықтармен марапатталды.
А.САМАТОВА,
«Семей таңы»
