Жуырда өткен Семей қаласы әкімдігінің кеңейтілген аппараттық кеңесінде алғашқы болып күзгі-қысқы кезеңде су бұру арналары мен арықтардың су өткізуге дайындығы мәселесі қаралды.
Бүгінде қаланың 16 ауданында орналасқан су бұру арналары мен арықтардың ұзындығы 52 шақырымды құрайды.
Дайындық кезеңі — қоқысты тазарту, шөпті шабу, су бұру арналарын тереңдету жұмыстары тамыз айынан басталып, қазіргі уақытта жалғасуда. Жұмыс нысандары Кордон, Контрольный, Затон, Дальняя, Березовский кенттері, Татимов, Огородная, Паровозная, Садовая, Макаренко, Ақкөл көшелері, 7-8 тұйық көше, Дөнентаев, Белібаев, Мичурин, Фестивальная көшелерінде орналасқан.
Су жіберуді жақсарту және саяжай алабы ауданындағы тұрғын үйлерді су басудың алдын алу үшін Шығыс кенті аумағында диаметрі 520 мм-лік құбырлар 700 мм-лік құбырларға ауыстырылды. Сондай-ақ Походная көшесінде құбырлар төселді.
Тұрғын үй — коммуналдық шаруашылық және тұрғын үй инспекциясы бөлімі тарапынан арықтарға түгендеу жүргізіліп, Амбулаторная, Терешкова, Сейфуллин, Фестивальная көшелерінде жаңа арықтар қажет екені анықталды. Арықтар тарту үшін 2022 жылы 8 миллион теңге көлемінде қаражат бөлуге өтінім жасалды.
Су бұру арналарын қадағалау бойынша жер учаскелерін өз бетінше иемденіп алу, су қорғау аймақтарында, сондай-ақ жер асты сулары бар аумақтардан жер беру сынды түйткілді мәселелер де бар. Жер иелері көбінесе арықтар өтетін аумақтарға кіргізбейтінін де айта кету керек.
Семей қаласының әкімі Бақытжан Байахметов жоғарыда аталған көшелерде осы жылдың соңына дейін қосымша суағарлар өткізу мүмкіндігін қарастыруды тапсырды.
— Егер осы жұмыстарды барынша жылдамдатуға және басқа жобалардан үнемдеу есебінен 8 миллион теңге іздестіруге мүмкіндік болса, онда оларды осы жылы аяқтау қажет. Бұл тұрғындардың жылдарға созылған проблемасы, сондықтан біз олардың қарапайым сұраныстарына жедел және тиімді жауап беруіміз керек, — деп атап өтті Бақытжан Байахметов.
Жер қатынастары және сәулет, қала құрылысы бөлімдеріне су қорғау аймақтарында жер учаскелерін сатуға жол берілмейтіні, бұл үшін Қазақстан Республикасының заңнамасына сәйкес жауапкершілік қарастырылғаны ескертілді.
Кеңейтілген аппараттық кеңестің қорытындысы бойынша сәулет және қала құрылысы бөлімінің жұмысы қанағаттанарлықсыз деп танылды. Жұмысқа немқұрайлы қарағаны үшін бөлім басшысына қатысты әкімшілік жазалау шаралары қабылданатын болады.
Семей қаласының ішкі саясат бөлімі
