23 қараша күні Абай атындағы театрда Республикалық «Абай Құнанбаев» қоғамдық қоры мен М.Төлебаев атындағы музыкалық училищенің ұйымдастыруымен Абай Құнанбаевтың музыкалық мұрасына және Ел Тәуелсіздігінің 30 жылдығына арналған мерекелік концерт өтті.
Республикалық «Абай Құнанбаев» қоғамдық қорының президенті Отантай Кәріпжановтың айтуынша, бұл концерт Ұлы Абайдың 175 жылдық мерейтойына арнайы дайындалып, пандемияға байланысты тоқтатылған.
— Ұлы Абай — ақын, философ, қазақ жазба әдебиетінің негізін салушы ғана емес, сонымен қатар дарынды композитор. Бүгінгі концертте ойшылдың бірнеше әндері шырқалады. Хакімнің мерейтойын атап өту сонау патша заманынан басталған. 1914 жылы, Абай атамыздың дүниеден өтуіне 10 жыл толуына орай, Торғайдан келген қаршадай қазақтың қызы Нәзипа Құлжанова Семейде үлкен кеш ұйымдастырып, орыс тілінде сауатты баяндама жасаған. Баяндаманы тыңдаған орыс ұлтының өкілдері көздеріне жас алып, тәнті болған екен. Бұл туралы кейіннен «Қазақ» газетінде мақала да жарыққа шыққан болатын,- деді Отантай Кәріпжанов.
Кеш шымылдығын М.Төлебаев атындағы музыка училищесінің симфониялық оркестрі және хор ұжымы ашып, ҚР мәдениет саласының үздігі Болат Распековтің дирижерлігімен Абай операсынан «Той бастар» шығармасын орындады. Сонымен қатар республикалық байқаулардың лауреаттары – Е. Мұсаев, А. Тоқтыбаева, М. Қайсар, Ә.Әшірова, Ж.Тәжиев және«Нұрстар» вокалдық ансамблі, М.Төлебаев атындағы музыка училищесінің қазақ халық аспаптар оркестрі, домбырашылар ансамблі, қобызшылар ансамблі «Айттым сәлем, Қаламқас», «Желсіз түнде жарық ай», «Есіңде бар ма жас күнің?», «Ақылбайдың әні», «Көзімнің қарасы» әндерін, «Ажардың ариясын», «Торжорға» күйін, сонымен қатар басқа да авторлардың туындыларын орындады.
— Биыл Ел Тәуелсіздігімен бірге «Абай Құнанбаев» қоғамдық қорына да 30 жыл толып отыр. Осы жылдар ішінде ауыз толтырып айтарлықтай көптеген шаралар ұйымдастырдық. Өздеріңізге белгілі, 1990 жылы 27 ақпанда Ұлы Абайдың 150 жылдығын тойлау туралы ҚР Үкіметінің №67 қаулысы қабылданды. Қаулы шыққаннан кейін Семейдің зиялы қауымының бір аузыдан қолдауымен «Абай Құнанбаев» қоғамдық қоры құрылып, алғашқы президенті болып ҚР Жоғары Кеңесінің екі шақырылымының депутаты Хафиз Матайұлы Матаев сайланды. Белгілі ғалым, абайтанушы Қайым Мұхамедханов Алматыға ресми түрде шақырылып, «Абайдың ақын шәкірттері» кітабы жарыққа шықты. Бұл кітаптың кейіннен Мемлекеттік сыйлыққа ие болғанын білесіздер. Елбасы ЮНЕСКО-ға бірнеше мәрте хат жазып, ұлы Абайдың 150 жылдық мерейтойын дүние жүзі бойынша атап өтуге қол жеткізді (150 жылдық ЮНЕСКО көлемінде тойланатын мерейтой емес еді). Мәскеу, Пекин, Париж және Батыстың басқа да қалаларында, бұрынғы одақтас, бауырлас республикалардың бәрінде ойшылдың 150 жылдығы кең көлемде аталып өтті. Хакімнің шығармалары 33 тілге аударылды. Қордың осы уақытқа дейін атқарған жұмыстарын тізіп айтсақ, бір кешке жүк болары анық. Осы уақытқа дейін, өзге қалаларды қоспағанда, Семейдің өзінде 32 лекция — концерт, 16 кеш ұйымдастырылыпты.
Сөз соңында баршаңызды Тәуелсіздігіміздің 30 жылдығымен құттықтағым келеді. Ел іргесі аман, бауырымыз бүтін, аспанымыз ашық болсын,- деді Отантай Кәріпжанұлы.
Кеш соңында Семей қаласы әкімінің орынбасары Айдар Садырбаев, көлік колледжі директорының орынбасары Шаған Манапов құттықтау сөз сөйлеп, көрермендерді егемендігіміздің және «Абай Құнанбаев» қоғамдық қорының отыз жылдық мерейтойымен құттықтады.
Ж.ТӨЛЕГЕНҚЫЗЫ,
«Семей таңы»
