Сейсенбі, 23 қараша күні Семей қаласының аймақтық коммуникациялар қызметінде қала әкімінің орынбасары Дархан Жөргекбаев БАҚ өкілдерімен брифинг өткізді.
Брифингте шаһардың әлеуметтік және экономикалық дамуы туралы баяндалды.
Әкім орынбасары қаланың әлеуметтік-экономикалық дамуында оң динамика байқалатынын атап өтті. Экономиканың көптеген базалық салаларында көрсеткіштердің өсуі қамтамасыз етіліп, орташа жалақы 22,7 пайызға көбейген, 3,4 мыңнан астам жаңа жұмыс орындары ашылған.
Дархан Жөргекбаевтың айтуынша, алдағы жылы Семейде екі жаңа мектеп пайдалануға беріледі. Сонымен қатар Ертіс арқылы өтетін жаңа көпірдің құрылысына дайындық жұмыстары басталмақ.
Қарағайлы шағын ауданында, екіншісі Водный кентінде 2400 орындық тағы да үш мектептің құрылысы жоспарланып отыр.
Қала әкімінің орынбасары сондай-ақ Қарағайлы шағын ауданында 150 төсек-орындық мүгедектерге арналған оңалту орталығы салынатынын жеткізді. Оңалту орталығының жобалық құны 5,2 млрд теңге көлемінде, құрылыс 2022 жылдың соңында аяқталады деп жоспарланып отыр.
Жыл басынан бері қаланың өнеркәсіптік кәсіпорындары 245 млрд теңгенің өнімін өндірген. Өңдеу өнеркәсібінде өндіріс өсімі 37,3 мрд теңгені құрады.
Жиында аграрлық саланың жай-күйі, егін шаруашылығы мен мал шаруашылығын дамыту бағытында атқарылған жұмыстар жайлы да баяндалды. Өткен жылмен салыстырғанда ұсақ мал 7,2 пайызға, жылқы 15,5 пайызға, ірі қара саны 8,6 пайызға өскен. Ауыл шаруашылығының жалпы өнімі 43,6 млрд теңгені (өсімдік шаруашылығында 25,3 млрд теңге, мал шаруашылығында 18,2 млрд теңге) құрады. Ет пен сүт және жұмыртқа өндірісі — әрқайсысы 2,7 пайызға артқан.
Бөлшек тауар айналымы 206 миллиард теңгені құрады. Қалаға 78,5 млрд теңге инвестиция тартылған.
Дархан Жөргекбаев бұрынғы «Семей СУ» кәсіпорнынан QAZAQ ASTYQ GROUP ЖШС базасында өнімдерді өңдеу бойынша автоматтандырылған кешен енгізілгенін жеткізді.
— Мұнда 220 жұмыс орны ашылып, 4 мың тонна күнбағыс майы өндірілді. Зауыт мамыр айында пайдалануға берілгенімен, шикізат мәселесіне байланысты өнімді тек тамыз айында шығарды. Алдымен зауыт экспорт қажеттілігін жабады, артығы Семейде сатылатын болады, — деді Дархан Жөргекбаев.
Биыл он жылдан артық тоқтап тұрған Семей тері өңдеу зауыты іске қосылды. «Семей құс» ЖШС жұмысын жандандырып, 2021 жылдың соңына дейін 12 млн дана жұмыртқа өндіруді жоспарлап отыр.
Қала әкімі орынбасарының айтуынша, жыл соңына дейін 32 көшені жарықтандыру жұмыстары толық аяқталмақ. 18 көшені жөндеу келесі жылы жалғасады.
Спикер бағаны тұрақтандыру бағытында жүргізіліп жатқан шараларға да тоқталды.
— Қаланың тұрақтандыру қорында ұн мен көкөніс қоры жеткілікті. Нан–тоқаш өнімдерінің бағасын тұрақты ұстап тұру үшін 2000 тонна 1 сұрыпты ұн және 3100 тонна жеміс-көкөніс өнімдері сатып алынды. Жұмыртқаның бағасы да айтарлықтай төмен — 33 теңгеден болады деген болжам бар. Біз апта сайын жәрмеңке өткіземіз. Естеріңізде болса, бұрын ол тек қаланың солтүстік бөлігінде өткізілетін. Енді қаланың шығыс жағында да ұйымдастыруды жоспарлап отырмыз,- деді Дархан Жөргекбаев.
Жалпы, “Бизнестің жол картасы-2025″ бағдарламасы аясында белсенді жұмыстар жүргізілуде”, – деді түйіндеді сөзін Дархан Жөргекбаев.
Ұ.АТАНБАЕВ,
«Семей таңы»
