Облыс әкімі Даниал Ахметов өткен аптаның соңында аймағымызға қарасты қала және аудан әкімдерімен тұрғын үй, әлеуметтік нысандар құрылысы бойынша арнайы кеңес өткізді. Жиын барысында өңірлердегі тұрғын үй құрылыстары жайында сөз қозғалып, бірқатар міндеттемелер қабылданды.
Кеңес барысында аймақ басшысы құрылыс жұмыстары ойдағыдай жүргізіліп жатқан аудандар туралы айтып өтті. Бұл орайда Үржар және Зайсан аудандарында құрылыс қарқыны қуантарлық. Мәселен, Зайсан ауданында 12 мың шаршы метрді құрайтын құрылыс барысы жүргізілуде. Ал Риддер қаласында халық саны аталмыш аудандағыдай болғанымен, құрылыс көлемі 7 мың шаршы метрді ғана құрайды.
Облыс әкімі Даниал Кенжетайұлы жергілікті әкімдерге 2022 жылға арналған құрылыс бағдарламасын және 2023 жылға арналған міндеттерді дайындауды тапсырған болатын. Онда қанша тұрғын үй және қандай түрлер салынатыны туралы толық ақпарат қамтылып, жобалық-сметалық құжаттамаға басымдық берілген жобаларды көрсету керек.
-Біз өз тарапымыздан құрылыс алаңдарына инфрақұрылым тарту бойынша міндеттемелерді қабылдаймыз, коммерциялық тұрғын үй салуға келісім берген жеке инвесторларды қолдауға дайынбыз. Мен Зайсанда болған кезде тұрғындардың жеке тұрғын үй құрылысына қызығушылық танытып отырғанын көрдім. «Бір қабатты Шығыс» бағдарламасы аясында 106 мың шаршы метр жеке тұрғын үй салдық, бұл өткен жылмен салыстырғанда үш есеге көп. Бұл жақсы, өйткені көп балалы отбасылар мен жас мамандарға көрсетілетін қолдауға қарамастан, біз тәуелділік сезімін тудырмауымыз керек, — деп атап өтті бұл орайда Даниал Кенжетайұлы.
Тағы бір айта кетер жайт, ағымдағы жылы облысымыз бойынша 280 млрд теңгеге 1,4 млн шаршы метр тұрғын үй салынуда. Оның ішінде 125% өсіммен 647 мың шаршы метр пайдалануға беріледі. Жеке инвестицияларды тарту есебінен коммерциялық тұрғын үй құрылысының тетігі толықтай түрде әзірленіп, енгізілді.
Сонымен қатар, облыс әкімі баса тоқталғандай, аймағымыздағы Алтай және Шемонаиха өңірлерінде салынып жатқан үйлердің санын көбейту қажеттілігі де туындауда.
Қарашаның аяғында облыс басшысы қалалар мен аудандар әкімдерін жекелей қабылдай бастайды, ол жердегі негізгі мәселелердің бірі тұрғын үй мен әлеуметтік нысандардың құрылысы болатыны сөзсіз. Бұл орайда осы айдың соңына дейінгі бір аптаның ішінде нақты міндеттемелер анықталып, атқарылған жұмыстар сарапталуы тиіс.
Өз тілшіміз
