Жаңа жоба
Семейде арнайы Шығыс Қазақстан және Қызылорда облыстарының мектеп оқушылары мен мұғалімдері үшін ұйымдастырылған STEM Kyzdar жобасына қатысып, STEM-дағдылары мен сыни ойлау бойынша оқудан өткен Шығыс Қазақстан облысының мектеп оқушылары мен мұғалімдеріне сертификаттар табыстылды.
Тренерлердің бірі Бақтияр Теміровтің айтуы бойынша, STEM Kyzdar жобасы арнайы Шығыс Қазақстан және Қызылорда облыстарының мектеп оқушылары мен мұғалімдері үшін ұйымдастырылған. Жоба Қазақстанның ірі қалаларының тұрғындарымен қатар, өңірлердің де тұрғындарына қажетті технологиялық дағдылар алуына мүмкіндік берді.
Айта кетейік, бағдарлама STEM-білім беру саласындағы бастамаларды қолдауға, STEM салаларында, атап айтқанда халықтың осал топтарынан шыққан қыздар үшін әлеуетті дамытуға және STEM-тренерлерін дайындауға бағытталған.
Оқыту барысында қатысушы қыздар роботты техника бойынша халықаралық жарыстарға, атап айтқанда FIRST чемпионатының қазақстандық кезеңіне қатысуға дайындалды.
STEM Kyzdar сияқты жобалар бойжеткендер үшін пайдалы, себебі аталмыш жоба оларға өздерін сынап көруге, өз әлеуетін STEM салаларында және әйелдер әзірше аз таңдайтын мамандықтарда байқап көруге мүмкіндік береді.
STEM саласында әйел адамдар шынымен де жеткіліксіз. ЮНЕСКО деректеріне сәйкес, әйелдер техникалық мамандықтар бойынша оқитын студенттердің жалпы санының 35%-ын ғана құрайды. Microsoft есебінде келтірілген басқа статистика да осындай жағдайды көрсетті: қыз балалар 11-12 жасында нақты ғылымдар мен инженерияға қызығушылық білдіре бастайды, алайда 3-4 жылдан кейін қызығушылықтары күрт төмендейді. Бұған оқушы қыздардың ата-аналарының жеке талғамы мен STEM саласы туралы теріс түсініктері, мұғалімдерінің, отбасы мен қоғамның тарапынан қолдау көрсетілмеуі, кәсіби бағдарлау жұмысының дұрыс жүргізілмеуі сияқты жағдайлар себеп болуы мүмкін.
STEM Kyzdar жобасында қыздар жобалау әдісі негізінде оқиды: олар өмірден алынған шынайы мәселелерді шешіп және бағдарламалау мен роботты техниканы үйреніп, алған білімін қолдана отырып роботтар құрастырды. Сонымен қатар олар командада жұмыс істеуге, көпшілік алдында сөйлеуге, өзін және өз жобасын таныстыруға, сыни және шығармашылық тұрғыда ойлауға үйренеді. Мұндай дағдылар оларға STEM Kyzdar жобасының аясында ғана емес, сондай-ақ одан тыс салаларда – жарыстар мен олимпиадаларда, келешектегі оқуы мен жалпы болашағына үлкен мүмкіндіктер береді.
STEM Kyzdar жобасында, мектеп оқушыларымен қатар, педагогтер де оқыды. Атап айтқанда математика, физика, химия, биология, информатика пәндерінің мұғалімдері қатысты.
Шетелдік сарапшылар Гордон Кеннеди (Ұлыбритания/Италия) мен Илья Мествиришвилидің (Грузия) жетекшілігімен мұғалімдер өзекті әдістемені меңгерді. Бұл әдістемелер сабақтарды түрлендіруге, оқушыларды оқу үдерісіне қызықтыруға, материалды жақсырақ меңгеруге, оқушылармен бірге сапалы зерттеулер мен эксперименттер жүргізуге, ғылыми жобалар жасауға көмектеседі. Сонымен қатар педагогтер алған білімін әрі қарай өз мектептеріндегі, аудандары мен өңірлеріндегі әріптестерін оқыту үшін пайдалана алады.
«Тренингтегі оқу қызық өтті, күн сайын жаңа нәрсені үйрендік. Алған білімімді қолданбалы математика сабақтарында, факультативтік сабақтарда және жобалау қызметімде және оқушылардың математикаға деген қызығушылығын арттыру үшін пайдаланамын», — дейді STEM Kyzdar жобасына қатысушылардың бірі.
Семей қаласының ішкі саясат бөлімі ақпараты негізінде әзірленді
