Күн тақырыбына
Шығыс Қазақстан облысында Pfizer вакцинасын жалпы саны 85 мың бала алуы тиіс. Бұл жайлы аймақ басшысы Даниал Ахметов өзінің Facebook әлеуметтік желісіндегі жеке парақшасында жазды.
— Өңірде вакцина алғандардың саны 901 мың адамға жетті. Бұл — жалпы Шығыс Қазақстан тұрғындарының 67 пайызы. Алдағы бір-екі күнде вакцинацияның 2-ші компонентін алуды аяқтауымыз керек. Нәтижесінде облыс жұртшылығының 95%-ы вакциналанады. Бұл ел бойынша алдыңғы қатарға шығуымызға және «жасыл» аймақта қалуымызға мүмкіндік береді, — деді өз сөзінде Даниал Кенжектайұлы.
Аймақ басшысы Даниал Ахметовтың айтуынша, бүгінгі таңда облысқа Pfizer вакцинасының 35 мың дозасы жеткізілген. Аталмыш шетелдік екпе түрі, егер қажеттілік туындаса, алдағы уақыттарда да алынатын болады.
— Ел Президенті Қасым-Жомарт Тоқаевтың тапсырмасына сәйкес, облысқа Pfizer вакцинасының 35 мың дозасы жеткізілді. Сондықтан жақын арада 12 мен 18 жас аралығындағы 85 мың бала, аяғы ауыр және бала емізетін әйелдер коронавирус инфекциясына қарсы екпе алуы қажет. Бұл ұжымдық иммунитетті нығайту мен аурудың таралуына тосқауыл бола алады. Осы ретте вакцина салдырған барша шығысқазақстандықтарға ризашылығымды білдіремін. Енді, ең бастысы, ата-аналар балалар вакцинациясына асқан жауапкершілікпен қарауы қажет. Бүлдіршіндерді қауіпті дерттен құтқару – бәрімізге міндет, — деді облыс әкімі.
Қазіргі таңда аймағымызда түсіндіру жұмыстар жүргізіліп жатыр. Соның нәтижесі болса керек, бүгінгі таңда Шығыс Қазақстан облысында екі мыңға жуық ата-ана баласына коронавирусқа қарсы екпе салдыруға келісім берген.
ШҚО Ақпарат орталығында өткен баспасөз мәслихаты барысында облыстық Денсаулық сақтау басқармасы басшысының орынбасары Элмира Рахымбаева аймағымызда оқушыларға Pfizer вакцинасы салына бастағанын мәлім етті.
— Жалпы Шығыс Қазақстанда қазіргі уақытта 2 мыңға жуық ата-ана баласына екпе салдыруға келісім беріп отыр. Барлық мектеп вакцинация науқанын бастауға дайын. Екпе алған балаларда теріс реакция байқалған жоқ. Олар бірнеше күн бойы медицина қызметкерлерінің бақылауында болады. Облыс бойынша коронавирус вакцинасын 80 мыңнан астам бала алады деп жоспарланған, — деді ол.
Элмира Рахымбаеваның айтуынша, аймақ ауруханаларында қауіпті дертке шалдыққан 14 жасөспірім емделіп жатыр екен. 80 сынып карантинге жабылып, балалар екі аптаға қашықтан оқытуға көшірілген.
Екпе алған оқушылар бойынша Өскемен қаласы көш бастап тұр. Pfizer вакцинасын алғашқы болып жасөспірімдер салдыруда.
ШҚО денсаулық сақтау басқармасы баспасөз қызметінің мәліметіне сүйенсек, Өскеменде жасөспірімдер коронавирус инфекциясына қарсы америкалық Pfizer екпесінің алғашқы дозасын алуды осы аптаның басында бастады.
«Өткен аптада облысқа аталған вакцинаның 35 100 дозасы жеткізілген болатын. «Бұл вакцина жүкті және бала емізетін әйелдерге, 12-18 жас аралығындағы балаларға арналған. Бүгінгі таңда аймақ бойынша осы санаттардағы 120 000-ға жуық адам бар. Оның ішінде 85 мыңы – балалар», — делінген облыстық денсаулық сақтау басқармасы баспасөз қызметінің ақпаратында.
Бұл ретте Өскемендегі №1 және №2 емханаларға екпе алуға жасөспірімдер өз еріктерімен келіп жатыр.
Жасөспірімдер екпе жайлы ақпараттармен жақсы таныс. Олар вакцина салдыру, ең алдымен, өздерінің қауіпсіздіктері мен денсаулықтары үшін қажет деп санайды. Оқушылар да бұрынғы қалыпты өмірге тезірек оралуды қалайды.
Сөз орайында айта кетсек, бүгінгі таңда Шығыс Қазақстан облысындағы стационарларда коронавирус жұқтырған 566 ересек адам емделуде. ШҚО Денсаулық сақтау басқармасы баспасөз қызметінің мәліметі бойынша, өткен тәулікте өңір бойынша 42 адам СOVID-19 инфекциясын жұқтырған. Оның ішіндегі 39 науқаста симптом бар болса, үш адам вирусты симптомсыз өткеруде.
«16 қараша бойынша Шығыс Қазақстандағы стационарларда 566 адам емделіп жатыр. Облыс бойынша төсек қорының жүктемесі – 15%. Соңғы бір күннің ішінде 16 пациент қауіпті дерттен толықтай сауығып шықты. Сондай-ақ 6 симптомсыз вирус тасушы үй карантинін аяқтады», — делінген аталмыш ақпаратта.
Естеріңізге сала кетсек, осыған дейін Шығыс Қазақстан облысы вакцинация алу бойынша республика көлемінде алдыңғы орынға шыққан болатын.
Мамандардың айтуынша, вакциналау неғұрлым баяу жүргізілсе, вирустың түрленуіне соғұрлым мүмкіндік жасалады. Ал вирус неғұрлым жылдам түрленсе, вакцинаның күші жетпейтін немесе әсері әлсіз болатын індет түрі пайда болу мүмкіндігі артады. Сондықтан, вирустың түлене түсуіне жол бермеу үшін, вакцинацияны барынша жылдам жүргізу қажет. Алғашқыда екпенің тиімділігіне сенбейтіндер көп болғаны белгілі. Ал бүгін, вакциналау басталғаннан бері 8 ай өткенде, статистикалық деректер вакцинацияның тиімді екенін көрсетіп отыр. Вакцинация басталған 1 ақпаннан бері коронавируспен ауырғандардың 96 пайызы екпе алмаған. Яғни, ауру жұқтырғандардың 4 пайызы ғана екпе алғандар. Бұл — вакцинаның тиімділігін дәлелдеп отыр.
Дәрігерлердің міндеті – вирустың екпеге ырық бермейтін түрі пайда болуына жол бермеу.
Әлібек КЕМЕЛХАН,
«Семей таңы»
