Семей қаласының әкімі Бақытжан Байахметов полиция қызметінің сервистік моделінің тұсаукесеріне қатысты. Аталған шара жаңадан салынып жатқан Қарағайлы шағын ауданында орналасқан учаскелік полиция бөлімшесінде өтті. Мұнда барлығы 40 мың тұрғынға арналған 200 үй салынады.
Бақытжан Байахметов аталған пунктті ШҚО ІІД теңгеріміне беру туралы сертификатты табыс етті.
— Мемлекет басшысы Қазақстан халқына жыл сайынғы Жолдауларында полиция қызметінің сервистік моделін ұлғайтуға жергілікті мемлекеттік органдарды тарту міндетін қойып отыр. Осы мақсатта аталған модельді жүзеге асыру Nur Otan партиясының сайлауалды бағдарламасын іске асыру жөніндегі Жол картасына енгізілген, — деп атап өтті қала әкімі.
Полицияның сервистік моделі — бұл полицияның, атқарушы биліктің және қоғамның қауіпсіздікті қамтамасыз ету мәселелерін шешудегі бірлескен қызметі.
Сервистік моделді дамытуда үш негізгі вектор айқындалған.
Біріншісі — азаматтардың полицияға қол жеткізуін барынша жеңілдетуге бағытталған қадамдық қолжетімділік. Бұған учаскелік пункттерді, жылжымалы посттарды, олардың материалдық — техникалық жарақтандырылуын оңтайлы орналастыру, жедел әрекет ету қабілетін арттыру, сонымен қатар цифрлық технологияларды қолдану кіреді.
ШҚО Полиция департаментінің басшысы Сағат Мәдиевтің айтуынша, қазіргі уақытта 7 модульдік бекет енгізілген, оның 5-уі Өскеменде және 2-уі Семейде. Сонымен қатар учаскелік полиция қызметкерлеріне 20 «Нива» қызметтік көлігінің кілті табыс етілді.
Екінші вектор – ықтимал қауіптерді дер кезінде жою арқылы құқық бұзушылықтың алдын алу, мұнда негізгі рөл учаскелік полиция қызметкерлеріне жүктеледі.
Учаскелік полиция инспекторларының мәртебесі заң жүзінде бекітілген, оларға құқық бұзушылықтар жасауға ықпал ететін себептер мен жағдайларды жою туралы өз бетінше ұсыныстар енгізу өкілеттіктері берілген.
ШҚО полиция департаментінің басшысы жалпы қылмыстың, оның ішінде ауыр және аса ауыр қылмыстың 22 пайызға (2968-ден 2311-ге дейін), тонаудың 37 пайызға (237-ден 150-ге дейін), бұзақылықтың 15 пайызға (248-ден 210-ға дейін) және ұрлықтың 24 пайызға (5321-ден 4057-ге дейін) төмендегенін атап өтті.
Үшінші вектор – халықпен тығыз қарым – қатынаста болу, өйткені қауіпсіздік мәселелерін тиімді шешу тұрғындардың белсенді көмегі арқылы ғана мүмкін болады.
Осы мақсатта учаскелік инспекторлар тоқсан сайын тұрғындармен кездесулер өткізіп, өзекті мәселелерді бірлесіп шешуде. Бүгінгі күнге дейін 1660 жиын өткізілді.
— Ең бастысы — адамдардың қауіпсіздігін қамтамасыз ету. Полиция жұмысындағы мұндай бастамалар құқық қорғау органдарының қолжетімділігін едәуір арттыруға және құқық бұзушылық фактілеріне тезірек шара қолдануға мүмкіндік береді. Сонымен қатар полицияның мәртебесі мен беделі артады, — деді Семей қаласының әкімі Бақытжан Байахметов.
Бүгінгі күні қалада 2 модульдік полиция бекеті орналасқан: Қайым Мұхамедханов көшесінде және Мұхтар Әуезов атындағы алаңда. Мұнда полиция қызметкерлері бекітілген аумағында патрульдеуді бір мезгілде азаматтар көп жиналатын жерлерде тұрақты түрде жүргізеді. Бекет 4 бөлмеден тұрады және желдету, жарықтандыру, электрмен жабдықтау, су құбыры және кәріз жүйесімен жабдықталған.
Семей қалалық ішкі саясат бөлімінің мәліметі негізінде әзірленді
