Елімізде 12 жастан асқан балалар мен бала емізетін және жүкті әйелдерді вакцинациялау басталды. Оларға Pfizer вакцинасы егіліп жатыр.
Балаларды вакцинациядан өткізу алдында барлық ата-аналарды түрлі сұрақтар алаңдатып отыр. Ана және дәрігер ретінде мен, әрине, сіздерді жақсы түсінемін, өйткені балаларымыз – бауыр етіміз. Әйтсе де дәл осы сәтте бізге үлкен жауапкершілік артылып тұрғанын түсініп, балаларымыз үшін ең дұрыс шешімді қабылдауымыз керек. Барлық алаңдаушылық пен үрей қажетті ақпараттың жеткіліксіздігінен туындайды.
Бүгінгі күрделі жағдайда ең маңызды шешімдердің бірі — вакцина алып, өзімізді, балаларымызды, бүкіл отбасымызды және қоғамды COVID-19 індетінен қорғау. Осы қадамды не үшін жасауымыз керек?
Коронавирустық инфекция тек ересектер ғана емес, балалар арасында да таралып бара жатыр. Сонымен қатар көптеген әлеуметтік мәселелерді де айқындады.
Барлығымызға мәлім жағдай: онлайн оқу білім сапасын күрт төмендетті, құрдастарымен тікелей қарым-қатынастың үзілгендігі балалардың әлеуметтік және психологиялық жағдайына кері әсерін тигізді, жасөспірімдер арасында күйзеліс және суицид жағдайларының ұлғаюы жөнінде ресми деректер бар; пандемияның әр жаңа толқынымен балалар арасында аурудың күрт өсуі байқалады.
Кейінгі 6 аптада АҚШ-та кәмелетке толмағандар арасында 1 миллионнан астам ауру тіркелді, Израильде инфекцияны жұқтырғандардың төрттен бірі — 18 жасқа дейінгі жастар. Сондықтан бұл індетпен күресу үшін жаппай вакцинация өткізу қажеттілігін түсінуіміз керек. Балаларымыз да қоғамның мүшелері, олар да бұл індеттен қорғалуға құқылы.
Аурулар вакцинасыз күрт өсіп, тез тарайды, ал салдары ауыр болады. Мысалы, қызылша және басқа аурулар өте жоғары қауіп төндіреді. Сондықтан вакцина бұл аурулардан қорғап, аурудың таралуын тоқтатады.
Осы күні COVID-19 ауруына қарсы 200-ден астам вакцина бар. Әлемдік тәжірибеде Pfizer үздік вакциналардың бірі болып танылған. Елімізде балаларды қорғау үшін осы вакцина таңдалғаны да кездейсоқ жағдай емес, өйткені: вакцинаны беделді компания жасаған, екпе ересектер мен балалар арасында сынақтан өтіп, әлемде ең қауіпсіз және тиімді вакцина болып танылды, вакцинациядан кейінгі асқынулар өте сирек кездеседі және сырқаттану қаупінен төмен, бұл вакцина Еуроодақ, Ұлыбритания, Израиль және тағы басқа елдерде кеңінен пайдалануда.
Сонымен, Пфайзер вакцинасы деген не?
Оның басты компоненті – матрицалық РНК, бұған коронавирустың негізгі ақуызы туралы ақпарат енгізіледі. Бұл ақпарат ағзаға келіп түскенде иммундық жауап өндіріледі. Ағзада нақты вирус пайда болғанда осы иммундық жауап ағзаны қорғайды. Балаларымызға туған сәттен вакцина жасап, полиемилит, дифтерия, сіреспе сияқты қауіпті жұқпалардан балаларымызды сақтап келеміз. Бүгінгі күні де балалар екпе алса, жанымыз тыныш болады.
Сынақ барысында Pfizer вакцинасының бір екпесі COVID-19 ауыр формасымен сырқаттануды 94 %-ға төмендететіні анықталды, бұл – екпе алған адамдардың өз денсаулығына деген сенімін арттыратын өте жоғары нәтиже.
Ана және профилактикалық медицина саласында үлкен тәжірибесі бар дәрігер ретінде мен бұл вакцинаның қауіпсіздігіне сенімдімін.
Осы мақалам арқылы ата-аналарға дұрыс шешім қабылдауға септігімді тигізсем деймін.
Мен сіздерді қолдауға дайынмын! Жақындарыңызға жанашыр болыңыздар!
Жанат МОЛДАҒАЛИЕВА,
Семей қалалық мәслихатының депутаты,
Nur Otan партиясының білім беру және денсаулық бойынша
Қоғамдық кеңесінің мүшесі,
Семей қ. №7 емханасының директоры,
медицина ғылымының докторы
