Жастар саясаты
Семейде NEET санатындағы жастардың мәселелері талқыланды. Қалада екінші жыл қатарынан NEET санатындағы жастарды әлеуметтендіру бойынша арнайы жоба жүзеге асырылуда.
NEET — бұл түрлі себептер бойынша оқымайтын, жұмыс істемейтін және өз біліктілігін көтермейтін жастар. Жоба шеңберінде NEET санатындағы жастардың проблемаларына кешенді түрде қарауға мүмкіндік беретін жұмыстар жүргізілуде. Бұл туралы толығырақ Семей қаласының аймақтық коммуникациялар қызметінде өткен баспасөз конференциясында «Жастар және балалар ұйымдарының Шығыс Қазақстан облыстық Ассоциациясы» Заңды тұлғалар бірлестігінің Семей қалалық филиалының директоры Эльзира Жүнісова мәлімдеді.
— Қазақстанда, статистика бойынша, NEET жастарының саны 6,7 пайызды құрады. Шығыс Қазақстанда 2021 жылдың екінші жарты жылдығының қорытындысы бойынша бұл көрсеткіш – 5,8 пайыз. Бұл көрсеткіш республикалық деңгейден айтарлықтай төмен. Пандемия кезеңінде NEET көрсеткіші барлық аумақта артты. Біздің басты мақсатымыз – NEET санатындағы жастарды әлеуметтендіруге жағдай жасау. Біз осы жобаны екінші жыл жүзеге асырудамыз және екі жыл көлемінде осы санаттағы жастармен жұмыс жүргізудеміз. Жоба шеңберінде жастардың қатысуымен семинарлар, сұхбаттасу алаңдары және басқа да іс-шаралар өткізілуде, — деді бұл орайда аталмыш бағытта толық мағлұмат берген Эльзира Жүнісова.
Жүргізілген әлеуметтік сауалнамаға сәйкес, бүгінгі таңда Шығыс Қазақстанда NEET санатындағы жастардың жұмыссыздығы 40,3 пайызды құрады. ШҚО жастарының жұмыссыз болуының басты себептерінің бірі – «жұмыс іздеуге деген ниеттерінің болмауы» емес, жұмыстың болмауы. Сондықтан, конференцияда айтылғандай, жастардың басты проблемаларының бірі жұмыссыздық болып қала береді.
Айтолқын САМАТОВА,
«Семей таңы»
