Коммуналдық қызмет
Ел шығысында көмір тапшылығы жоқ. Бұл жайында жуырда Семейдегі аймақтық коммуникациялар қызметінде болып өткен баспасөз мәслихатында айтылды. Атқарушы билік өкілдері сонымен қатар қатты отын уақытында жеткізілгендіктен, көмір бағасының көтерілмегенін де айтады.
Қазіргі таңда облысты қатты отынмен қамтамасыз ететін Қаражыра кенішінен көмір тиеу жұмыстары белгіленген жоспарға сәйкес жүргізіліп жатыр. Бұл ретте теміржолшылар шығыстағы тұрмыстық-коммуналдық саланы толықтай қатты отынмен қамтып отыр. Білім беру мекемелеріне, өзге де әлеуметтік нысандарға қатты отын 100 пайыз жеткізілген. Алдағы қыс қаһарлы болады деген болжам бойынша қосымша тапсырыс беріп жатқан мекемелер де бар. Ал жеке сектордағы тұрғындар қазіргі таңда қажетті көмір қорын дайындауда.
Жалпы аймақ бойынша көмірге қажеттілік бір жылу маусымына 3 900 000 тоннаны құрайды екен. Бүгінгі күндері Дегелең станциясындағы тоқтаусыз жұмыстың нәтижесінде қажетті қатты отынның 99 пайызы даярланыпты.
Ал өткен айдың басынан бері жеке тұрғындарға қажетті көмір барлық тұйық темір жол желілеріне үзіліссіз жеткізіле бастаған болатын. Қазіргі таңда Семейдегі төрт тұйық желіде жеткілікті мөлшерде көмір қоры бар. Бұл орайда бөлімшенің басты әріптестері саналатын «Жігер» ЖШС мен «Семей көмір» ЖШС қатты отынның техникалық және сұрыпталған түрлерін саудалауда. Бағасы 9 500 теңгеден басталады. Ал алдын ала жазылу арқылы алуға болатын әлеуметтік көмір құны сәл жоғарылау. Әрбір темір жол тұйығының тәулігіне 19 вагон көмір түсіруге мүмкіндігі бар. Сондықтан да болар, әлеуметтік көмірді есептемегенде, бүгінде қатты отынға кезек әлдеқайда азайған.
Қазіргі таңда облысымызда көмір бағасы мен маркаларын, сатылатын жерлер мен оларда көмірдің бар-жоғын халыққа жеткізіп, тиісті ақпарат беріп отыратын арнайы «жедел желі» құрылған. Яғни, көмірдің жеткізілімі мен сапасына қатысты мониторинг тұрақты жүргізілуде.
Бүгінгі көрсеткіш бойынша қарастырсақ, аймағымыздағы темір жол тұйықтарында 16,8 мың тонна көмір бар екен. Оның ішінде Өскеменде мың тонна, Семейде – 7,8 мың тонна, Риддерде – 3,2 мың тонна, Аягөз ауданында бес мың тонна, Жарма ауданында 800 тонна, Алтай ауданында 1,3 мың тонна, Шемонаиха ауданында 770 тонна бар. Осы орайда айта кетсек, қазан айының басында тек Өскемен қаласы бойынша ғана көмір қажеттілігінің артқаны байқалған. Облыстық тұрғын үй — коммуналдық шаруашылығы басқармасы «Қазақстан темір жолы» басшылығына қосымша вагондар бөлгізу туралы ресми хат жолдаған соң, бұл мәселе бүгінде шешімін тауыпты.
Дегелең станциясынан қазіргі таңда орта есеппен алғанда көмір тиелген төрт пойыз тұрақты түрде жолға шығарылуда. Жылжымалы құрамдардың барлығы да ауыр салмақты болғандықтан, пойыз құрастыру ісі біршама күш салуды талап етеді. Салмағы 6 200 тонналық 63 вагоннан тұратын жылжымалы құрамдар қозғалысында кедергі жоқ. Барлық жүк станцияларындағы маневрлік жұмыстар жедел түрде жүзеге асырылады. Локомотив пен вагон тапшылығын болдырмау мәселесі бөлімше басшысы Сиязбек Әлішевтің назарында тұр.
Азамат ЕРСАЙЫН,
«Семей таңы»
