Семей
Семей қаласының әкімі Бақытжан Байахметов бөлім басшылары және коммуналдық қызмет өкілдерімен бірге көшелер мен жерасты өткелдерін абаттандыру жұмыстарының барысын тексеріп қайтты.
Қала әкімі бастаған топ ең алдымен орталық көшелерге назар аударды. Мәселен, тамыз айында басталған Қ.Мұхамедханов көшесіндегі жер асты өткеліндегі жөндеу жұмыстары аяқталуға жақын. Дегенмен тексеру барысында мердігердің жұмысынан кемшіліктер анықталып отыр. Өткелдің кейбір жерлерінде кафельдер біркелкі орнатылмаған және тақталар сынған. Сонымен қатар жер асты өткелінен шығатын барлық төрт жолдың жағдайы да қанағаттанарлықсыз күйде. Бақытжан Кәкенқажыұлы көрсетілген кемшіліктер жойылғанға дейін мердігерге ақша төлемеуді тапсырды.
Ағымдағы жөндеу жұмыстары Достоевский және Қаржаубайұлы көшелеріндегі жер асты өткелдерінде де жүргізіліп жатыр. Жер асты өткелдерінде еден, төбе, қабырға жабындарын ауыстыру, жарықтандыру мен пандустарды монтаждау қарастырылған. Нысан қазан айында тапсырылмақ.
Тағы бір маңызды мәселе Энергетик кентіндегі жарықтандыру және жол жөндеу жұмыстарына қатысты болып тұр. Әкімнің жеке блогына хат жолдаған тұрғындар іргелес көшелерді жарықтандырып, жолдарды жөндеуді сұраған еді. Жедел кеңес барысында жөндеу жұмыстарының жоспарына түзетулер енгізу және оған Энергетик кентін абаттандыруды енгізу туралы шешім қабылданды. ШҚ АЭК және Сеченов аялдамасы маңында жақын арада жаңа тіректер мен шамдар орнатылып, жарықтандырылатын болады.
Қала басшысы Бақытжан Байахметов сондай-ақ оң жақ бұрылыстарды ретке келтіру жұмыстарын да тексерді. Биыл қаладағы көлік қозғалысы ең көп көшелерде 12 оң жақ бұрылыс абаттандырылады. Соның бірі Қаржаубаев — Сеченов көшелерінің қиылысында орналасқан. Аталмыш нысанды іске қосу автокөлік қозғалысын айтарлықтай жеңілдетуге мүмкіндік береді. Сонымен қатар Қаржаубайұлы көшесінде жол учаскесін кеңейту туралы алдын ала шешім қабылданды, мұнда қосымша көлік жүретін жолақ пайда болады.
Сонымен қатар қаланың Дальняя ауданында «Дорожник» қазандығынан №38 мектепке дейінгі жылу трассасына қайта жаңарту жүргізілуде. Мердігер ұйым – «BERTYS construction» ЖШС. Жұмысты аяқтау мерзімі бірнеше мәрте кейінге шегерілген болатын. Мердігер мекеме жұмысты 25 қазанға дейін аяқтауға уәде берді. Жұмыстар аяқталған соң мектеп осы қазандыққа қосылады.
Таңертеңгі рейд қорытындысында қала басшысы мердігерлердің жұмысына бақылауды күшейту тапсырды.
Қысқы уақытқа дайындық мәселесі де қала басшылығының назарында тұр. Себу материалдары дайын, ендігі кезекте техниканың уақтылы шығуын қамтамасыз ету қажет.
Жоспарланған жұмыстардың сапалы атқарылуына бақылау жасау мақсатында аптасына бір мәрте таңертеңгі рейдтер өткізілетін болады.
«СТ» — ақпарат
