ҚР Премьер-Министрі қызметіне Әлихан Смайылов тағайындалды.
Әлихан Смайылов 5 қаңтар күні Асқар Мамин басқарған үкімет отставкаға кеткен соң Премьер-министрдің міндетін атқарушы болып тағайындалған болатын.
Әлихан Смайыловтың кандидатурасын сейсенбі күні Парламент отырысында Қазақстан Президенті Қасым-Жомарт Тоқаев таныстырды. Талқылау барысында Мәжіліс депутаттары Президенттің ұсынысын бірауыздан қолдап, Әлихан Смайыловтың Үкімет басшысы болып тағайындалуына келісім берді.
Әлихан Смайылов 1972 жылы Алматы қаласында дүниеге келген.
1994 жылы Әл-Фараби атындағы Қазақ мемлекеттік ұлттық университетін «қолданбалы математика» мамандығы бойынша тәмамдаған.
1996 жылы ҚР Президенті жанындағы Қазақстан менеджмент, экономика және болжамдау институтының мемлекеттік басқару магистрі дәрежесіне ие болды.
1993–1999 жылдары — «А-Инвест» инвестициялық–жекешелендіру қорының бас маманы; бөлім басшысының орынбасары, ҚР Ұлттық статистика агенттігінің басқарма басшысы;
ҚР Статистикалық жоспарлау және реформалар жөніндегі агенттігінің Статистика және талдау комитеті төрағасының орынбасары; бас сарапшы, экономика секторының меңгерушісі, ҚР Президенті Әкімшілігінің мемлекеттік инспекторы болып қызмет атқарған.
1999–2003 жж. — ҚР Статистика агенттігінің төрағасы.
2003–2006 жж. — ҚР сыртқы істер вице-министрі, «Экспорттық несиелер мен инвестицияларды сақтандыру жөніндегі мемлекеттік сақтандыру компаниясы» АҚ басқарма төрағасы.
2006–2009 жж. — ҚР қаржы вице-министрі, «ҚазАгро» ҰХ президенті.
2009–2014 жж. — ҚР Статистика агенттігінің төрағасы.
2014–2015 жж. — ҚР Ұлттық экономика министрлігінің Статистика жөніндегі комитетінің төрағасы.
2015 жылдың желтоқсанында Мемлекет басшысының Жарлығымен ҚР Президентінің көмекшісі болып тағайындалды.
2018 жылғы қыркүйектен бастап 2019 жылғы ақпанға дейін — Қаржы министрі.
2019 жылғы 25 ақпанда Президент Жарлығымен Премьер-Министрдің бірінші орынбасары – Қаржы министрі қызметіне тағайындалды.
2021 жылы 18 қаңтарда ҚР Президентінің Жарлығымен Премьер-Министрдің бірінші орынбасары болып қайта тағайындалған еді.
Ә.Смайылов Премьер-министр ретіндегі алғашқы сөзінде Президент Тоқаев пен оның орынбасарларына осындай уақытта сенім білдіргені үшін алғыс айтты.
Басты міндеті елдегі макроэкономикалық тұрақтылықты қамтамасыз ету және инфляцияны төмендету екенін айтқан Смайылов: «Азаматтардың барлық заңды талаптары есепке алынып, орындалады»,- деді.
