Соңғы күндері елімізде орын алған жағдайларды барлықтарыңыз естіп, көріп отырсыздар. Егемен еліміздің азаматы ретінде, ел тәуелсіздігіне қауіп төніп тұрғанда, жай отыра алмадым. Интернет желісі қосыла салып, өз пікірімді айтуды жөн санадым.
Бейбіт түрде басталған шерудің соңы арандатушы содырлар мен лаңкестердің арам пиғылдарының себебінен осындай жағдайларға алып келді.
Ел басына күн туған сәтте елімен бірге болған Мемлекет басшысы Қасым-Жомарт Кемелұлы Тоқаевтың лаңкестерге қарсы пәрменді тапсырмалары мен төтенше жағдай жариялап, коменданттық сағат бекіткенін толығымен қолдаймын.
Ең басты құндылық адам өмірі десек, террористердің алауыздыққа бағытталған қасақана әрекеттері көптеген ел азаматтарының, оның ішінде сол азаматтарды қорғауға шыққан әскерилердің өліміне әкеліп соқты. Өз басым ел арасында іріткі туғызып, талай азаматтарды өлтіріп, мемлекет пен жеке тұлға меншіктеріне қомақты нұқсан келтірген, ел тәуелсіздігіне қауіп төндірген лаңкестер мен террористерді ұстап, қатаң жазалау керек деп ойлаймын.
Лаңкестер мен террористерге қарсы күресте, еліміздің біртұтастығын және егемендігімізді сақтау үшін күресте қаза болған азаматтардың туған-туыстарына қатты қайғырып, көңіл айтамын. «Ерлік өлім — өлмейтін өмір» дейді ғой дана халқымыз. «Шын батыр сын үстінде танылар» дегендей, елі үшін өмірін қиған батырлардың аты ешқашан өшпейді.
Жерлестеріме айтарым, коменданттық сағаттың талаптарын қатаң сақтап, өздеріңіздің, жақындарыңыздың қауіпсіздігін қамтамасыз ету мақсатында алауыздықты қоздыруға бағытталған қасақана әрекеттерге ермей, сабырлық танытып, сақтық шараларын, тыныштықты сақтауды сұраймын.
Мамырбек ҚАЛЕЛОВ,
Күршім аудандық мәслихатының хатшысы
