Шығыс Қазақстан облысында «Аңсаған сәби» бағдарламасы аясында тұңғыш нәресте жарық дүние есігін ашты. Шекесі торсықтай ұлдың салмағы — 3661 грамм, бойы — 52 см. Алғаш рет ана атанып отырған Алена Долгих осындай игі бағдарламаның іске асырылуына мұрындық болған Мемлекет басшысы Қасым-Жомарт Тоқаевқа өз алғысын білдіруде.
Ата-ана атанып отырған ерлі-зайыпты осы қуанышты 2016 жылдан бері күткен. Алена Долгихтың айтуынша, бірнеше жыл бойы бала көтере алмағандықтан әуелі Өскемендегі Ана мен бала орталығына барып денсаулығын тексертіпті. Ондағы дәрігерлер ем-дом тағайындағанымен, еш нәтиже болмаған көрінеді.
— 2020 жылы ЭКО-ға квота алу үшін құжаттарымды жинап, тиісті жерге өткіздім. Бірақ шынымды айтсам, кезегім осыншама тез келеді деп ойламаған едім. Оған Президентіміз Қасым-Жомарт Тоқаевтың «Аңсаған сәби» бағдарламасын іске қосуы себеп болды. Осының арқасында квота саны артып, кезек тез жылжыды. Сол үшін Мемлекет басшысына зор алғыс айтамын, — дейді 35 жастағы әйел.
Содан соң емхана таңдап, анализдер тапсыруға көшкен. Қажетті құжаттарды жинауға да көп уақыт кетпепті.
-Жаңа жылды біз көптен күткен ең үлкен сыйымызды алдық. Сондай бақыттымын. Барлық жұмыстар тегін, МӘМС аясында болды, отбасымыздан еш шығын шыққан жоқ. Ұлымыздың атын Марк деп қойдық, — деді Алена Долгих.
Осылайша Шығыс Қазақстан облысында «Аңсаған сәби» бағдарламасы бойынша тұңғыш нәресте дүниеге келді.
Тағы бір айта кететін жайт, өңірге бөлінген квота саны былтыр өсіп, 500 квотаны құрап отыр. Бұл — 5 немесе одан да көп жыл бала сүйе алмай жүрген отбасыларға берілетін квота.
Өз тілшіміз
