Семей қаласының әкімі Бақытжан Байахметов шаһарымызда қалыпты өмірді қамтамасыз ету мақсатында бірнеше жедел жиналыстар ұйымдастырды. Сондай жиындардың бірі 11 қаңтар күні Семей қаласындағы банк мекемелерінің басшыларымен өтті.
Бақытжан Кәкенқажыұлы банк басшыларына үздіксіз жұмысты қамтамасыз етуді тапсырды. Облыс әкімінің қолдауымен Семей қаласына қолма-қол ақша жеткізу бойынша барлық мәселелер шешілді. Енді банктердің өздері жедел әрекет етіп, банкоматтарға қолма-қол ақшаны тез толтырулары қажет.
– Бүгінгі таңда қалада 13 екінші деңгейлі банктің 39 филиалы тұрақты жұмыс істейді. Банкоматтардың басым көпшілігінде қажетті қолма-қол ақша бар, оның ішінде ұялы байланыс негізіндегі 29 банкомат бар. Банкоматтар ірі сауда орталықтарында да орналасқан. Тұрғындарда өнімдер мен тауарларды сатып алу үшін есеп айырысуда қолма-қол ақшаға қатысты мәселелердің туындамауы өте маңызды. Кәсіпорындарда жалақы беруде де мәселелер болмауы тиіс,- деді қала әкімі Бақытжан Байахметов.
«СТ»-ақпарат
