ШҚО-да 800-ге жуық қазақ тілі мұғалімдері біліктіліктерін арттыруға жіберілетін болады.
Бұл туралы облыс әкімі Даниал Ахметовтің төрағалығымен өткен кезекті кеңейтілген аппараттық кеңесте айтылды. Жиында көп тілді білім беруді дамытудың кешенді жоспарын жүзеге асыру мәселесі және басқа да бірқатар өзекті тақырыптар талқыланды.
– Біз ата-ана ретінде балаларымыздың мемлекеттік, орыс және ағылшын тілдерін жетік меңгергенін қалаймыз.
Кембридж университетінің әдістемесі бойынша шет тілдерін оқыту бағдарламасы өзінің тиімділігін көрсетті. Қазақ тілін оқытуды талдау кезінде әдістемеде жіберілген қателіктер анықталды. Осы ретте С. Аманжолов университеті орыс мектептерінде қазақ тілін оқытудың жаңа әдістемесін әзірледі. Қосымша әдістемелік материал оқытушыларға да, оқушыларға да мемлекеттік тілді үйренуге көмектеседі деп ойлаймыз. Жалпы, алдағы уақытта біліктілікті арттырудан 760-тан астам педагог өтетін болады. Қысқа мерзім ішінде біз еліміздің көптеген мектептері назарына алатын бағдарламаны жасайтынымызға сенімдімін. Ең бастысы, біздің балалар мемлекеттік тілде жетік сөйлей бастайды,- деді аймақ басшысы Даниал Кенжетайұлы.
Кеңес барысында сонымен қатар тағы бірқатар өзекті мәселелер талқыланды. Атап айтсақ, облыс басшысы мемлекеттік сәулет-құрылыс бақылау басқармасына Б.Момышұлы көшесіндегі 14 үйдегі жағдайды аяғына дейін жеткізуді тапсырды. Авторлық және техникалық қадағалау өз міндеттемелерін тиісті орындамағандықтан, көп қабатты үйдің тұрғындары зардап шеккен. Даниал Ахметов олар жіберген кемшіліктері үшін заң бойынша жауап беруге тиіс екендігін атап өтті. Сондай-ақ басқарма мамандарына осы құрылымдардың одан арғы жұмысы бойынша ұсыныстар енгізуді тапсырды.
Аппараттық кеңесте өңірді күз – қыс кезеңдерінде төтенше жағдайдан қорғауға дайындау мәселесі де қаралды. Облыста 41 рет дауылды ескерту жарияланып, 36 рет жолдар жабылғаны туралы хабарламалар келген. Ең бастысы, қар құрсауына түскен адамдардың ешқайсысы зардап шеккен жоқ. Көктемгі су тасқыны алдында кез-келген тосын жағдайларға қарсы тұру үшін өрт сөндіру техникасын қосымша жабдықтармен күшейту қажеттілігі де айтылды.
«СТ» – ақпарат
