Семейде көше жарығын жаңғырту жұмыстары жалғасуда, жаңа жылдың алғашқы күндерінен бастап қарқынды түрде жүргізіліп жатыр. Бұл жолы жарықтандыру «Казкрайда», Қосанов көшесінде, Алтай көшесінен Терешкова көшесіне дейін жүргізілді. Онда бұрыннан бар тіректерге қосымша 9 тірек орнатылып, 17 шам іске қосылды. Жалпы, 700 метр өздігінен оқшауланған сымдар тартылды.
Қосанов көшесінің тұрғындарымен кездесуде семейліктер қала әкіміне атқарған жұмыстары үшін алғыстарын білдірді. Қала тұрғыны Вера Казакова бұған дейін теледидардан қалада кейбір көшелердің жарықтандырылып жатқанын көргенін айтады. Бірақ ол өзі тұратын көше де жарыққа қосылады деп ойламаған.
— Мен осында қанша жыл тұрсам да, әкімді алғаш рет көзбе-көз көрдім. Осы көшеде тұратын әжелер мен аталардың атынан үлкен алғыс айтқым келеді. Көшеміз жарықтандырылды, жол да жасалды. Мұнда қаншама жылдан бері жарық та, жол да болмаған. Сіздердің атқарған еңбектеріңіз үшін көп рақмет, — деді Вера Казакова.
Өз кезегінде, Семей қаласының әкімі Біріккен Энерго Сервистік компанияның мердігерлік ұйымының жұмысшылары жаңа жылдың алғашқы күндерінен бастап, тұрғындарды жарықпен қамтамасыз ету үшін белсенді түрде жұмысқа кіріскенін атап өтті. Төтенше жағдай кезінде де энергетиктер жұмыстарын жалғастырған.
«Қаламыздағы жағдай тұрақты. Біздің елде болған жағдайды бәріңіз білесіздер. Президенттің белсенді жоспарларының, уақтылы қабылданған шаралардың арқасында біз жағдайды тұрақтандыра алдық. Қысқа уақыт ішінде барлық коммуникациялар іске қосылды. Қала өмірі қазір қалыпты», — деді Бақытжан Байахметов.
Сондай-ақ, Комсомол кентіндегі Бөрілі көшесі де жарықтандыруға қосылды. Онда 1400 метрге 50-ден астам шам орнатылды. Сол жағалаудағы Дружба көшесі мен Панфилов көшесіне дейін, Дулатов көшесінен Абай көшесіне дейін жарықтандыру жоспарда бар.
Тағы бір мердігер ұйым — Горсвет Рубусин көшесін жарықтандыруға қосады. Бұл Мичурин көшесінен Дальний көшесіне дейінгі бұрылыс. Онда 18 тірек, 16 шам орнатылып, 550 метр өздігінен оқшауланған сым тартылды.
Бұл ұйым техникалық шарттар бекітілгеннен кейін «Бір қабатты Шығыс» бағдарламасы бойынша салынған кенттердегі көше жарығын жаңғырту жұмыстарын аяқтайды.
Семей қалалық ішкі саясат бөлімі
