Облыс әкімі Даниал Ахметовтің назарға алуымен Шығыс Қазақстан облысында қысқы туризмді дамыту мақсатында бірқатар іс-шаралар атқарылуда.
ШҚО Туризм және сыртқы байланыстар басқармасының мәліметіне сүйенсек, өңірде қысқы туризмді дамытуға мүмкіндік көп. Шығыс Қазақстан — еліміз бойынша қар жамылғысы ең ұзақ сақталатын аймақ. Сондықтан қысқы туристік маусым 6 айға дейін созылады. Бұл ретте таулы әрі қарлы аймақ саналатындықтан Өскемен мен Риддер және Алтай қалаларында, Катонқарағай мен Үржар аудандарында қысқы туризмнің түрлері жақсы дамыған.
«Қазіргі уақытта бізде тау шаңғысы туризмі айтарлықтай жоғары деңгейде дамып келе жатыр. Шаңғы және сноуборд әуесқойлары үшін әр түрлі қиындық санатындағы беткейлері бар көптеген курорттар жұмыс істеп тұр. Олар тәжірибелі шаңғышылар мен сноубордшыларға және әуесқойларға да қолайлы. Базалар Өскемен мен Риддер қалаларының іргесінде орналасқан», — делінген аталмыш басқарма таратқан ақпаратта.
Қысқы туризм сонымен қатар басқа аудандарда да оң қарқынмен дамып келеді. Атап айтсақ, Зайсан ауданында «Айка» шаруа қожалығы, аңшылық турларын ұйымдастырумен қатар, жыл бойы сауықтыру қызметтерін (пантотерапия, қымызбен емдеу) көрсетеді.
Ал Катонқарағай ауданында өткен жылы Qaton Qaragai Resort пантымен емдеу орталығы бой көтерді. Ол қыс айларында да үздіксіз режімде жұмыс істейді.
Аталмыш база аумағында туристер шаңғы теуіп, атқа мініп, сырғанаққа барады.
«Жыл сайын қысқы туризм бойынша арнайы нұсқаулық әзірленеді. Сол арқылы туристер демалуға баруға болатын орындарды таңдап, ол жаққа қалай жетуге болатынын біліп, басқа да қызықты ақпараттармен таныса алады. Өңірге қыс кезінде келушілер санын арттыру үшін бейнероликтер түсіріліп, әлеуметтік желілерде жариялануда», — делінген басқарманың баспасөз қызметі таратқан хабарламада.
Ал Шемонаиха мен Жарма аудандарында және Семей мен Аягөз қалаларында допты хоккей мен шаңғы спорты жақсы дамуда. Бұл спорт түріне әсіресе жасөспірімдер ерекше ынта танытады екен.
Әлібек КЕМЕЛХАН,
«Семей таңы»
