Семей қаласындағы облыстық Абай атындағы әмбебап кітапханада «Senimen bolashaq» республикалық ата-аналар қоғамдық бірлестігінің ұйымдастырумен «Ата-ана – ұлттың ұясы» тақырыбымен форум өтті.
Шараның мақсаты — ата–аналарға бала тәрбиесінде ағартушылық, әдістемелік білім беру, қолдау көрсету, сондай–ақ дәстүрлі тәрбие берудің ұтымды жақтарын, отбасы институтындағы әжелер мектебі мен әкелер кеңесін жандандыру. Отбасы институтының түрлі мәселелері талқыланған форумға Семей қаласы әкімінің орынбасары Айдар Садырбаев, қалалық білім бөлімі басшысының орынбасары Біржан Заманбекұлы, Назарбаев Зияткерлік мектебінің директоры Бағдан Қайыржанов, Әлихан Бөкейхан университетінің проректоры Айрат Базенов және мектеп ұстаздары мен ата-аналар қатысты.
Форумның ашылуында сөз алған «Senimen bolashaq» республикалық ата-аналар қоғамдық бірлестігінің негізін қалаушы Нұркен Асанов қазіргі уақыт қоғам келешегі, ертеңгі арқа сүйеріміз балалардың тәрбиесіне саналы түрде көңіл бөлуді талап етіп отырғанын ерекше атап өтті. Ата-аналарымыздың көпшілігі күнделікті күйбең тіршілікпен ұрпақ тәрбиесіне лайықты деңгейде көңіл бөле алмай отырғандығын айта келіп, осы кемшілікті түзеуді қазірден бастап қолға алу қажеттігін еске салды.
Осы бір тұшымды ойды мектебіміздің директоры Бағдан Тоқтамысұлы да жалғастырып, бала тәрбиесіне қатысты ұзақ жылғы ұстаздық тәжірибесінен ой бөлісті.
Форум аясында ата-аналармен байланыстырыла жүргізілген тренинг олардың белсенділігін арттырып, тың мағлұматар алуға септігін тигізді. Мысалы, бала тәрбиесі жөніндегі сарапшы маман Елжас Ертайұлы жүргізген «Бақытты бала химиясы» және педагог-профориентолог Нариман Утеубаевтың жүргізген «Искусство ошибаться» деп аталатын тренингтердегі берілген бірқатар психологиялық, педагогикалық әдіс-тәсілдер көптеген ата – аналарға жаңаша ой салғаныны анық.
Шара барысында қалалық ата–аналар кеңесінің мүшелері, Назарбаев Зияткерлік мектебінің педагог-ұйымдастырушы-кураторлары, өзге де білім мекемелерінің ұстаздары мен ата–аналары бала тәрбиесіне қатысты ой алмасып, алдағы уақытта бірлесе жұмыс жасауға уағдаласты.
«Senimen bolashaq» республикалық ата-аналар қоғамдық бірлестігінің Шығыс Қазақстан облыстық филиалының Семей қаласында ашылуы ата–аналар үшін жағымды жаңалық болды. Аталған филиал директоры Аман Рахметуллин жаңадан ашылған филиал қоғамдық бірлестіктің барлық мақсат — міндеттерін жүзеге асыратынын атап өтіп, келешекте саналы да сапалы ұрпақ тәрбиелеуде ұстаздар мен ата – аналарды бір жеңнен қол, бір жағадан бас шығарып қызмет етуге шақырды.
Нұржанат КАСИМОВА,
Семей қаласындағы ФМБ НЗМ педагог-ұйымдастырушы-кураторы
