Облыста ел Президенті қойған барлық міндеттер орындалған. Бұл жайында аймақ басшысы Даниал Ахметов қала және аудан әкімдерімен, сондай-ақ басқарма басшыларымен өңірдің 2021 жылғы әлеуметтік-экономикалық даму қорытындылары жөнінде өткен кеңесте айтты.
Көптеген көрсеткіштер бойынша, атап айтқанда, өнеркәсіп пен аграрлық секторда қарқынды өсім байқалады. Агроөнеркәсіп кешені саласында 600-ден астам жоба іске асырылып, жаңадан 1500 жұмыс орны құрылды.
— Біз құрылыс саласында да жақсы көрсеткіштерге иеміз. Аягөз және Зайсан аудандарында коммерциялық тұрғын үйлерді пайдалануға берудің оң қарқынын атап өткім келеді. Яғни аталмыш аудандардың әкімдері жергілікті жерлерде жүйелі жұмыс атқаруда. Барлық әкімдерге бұл үлгі болу керек. Бұдан басқа жергілікті жерлердегі әкімдер елді мекендердің тұрғындары нені және қашан салынатынын немесе жөнделетінін нақты түсінуі үшін ақпараттық сүйемелдеуді қамтамасыз етуі тиіс. Сондай-ақ олар барлық конкурстық рәсімдердің, әсіресе, тұрғын үй құрылысы саласында уақтылы өткізілуін қамтамасыз еткендері дұрыс. Денсаулық сақтау саласында да біз үздік шетелдік клиникаларда дәрігерлердің біліктілігін арттыру бойынша жұмысты жалғастырудамыз, онкология және қан айналымы жүйесі аурулары саласындағы мамандарға басымдық берілуде, — деді жиында Даниал Кенжетайұлы.
Сондай-ақ аймақ басшысы атап өткендей, облысымыздағы клиникаларды ең озық диагностикалық жабдықтармен жабдықтау да басты назарда.
Өңірде туберкулез деңгейі 38 пайызға төмендеген. Бұл — ортақ істің нәтижесі. Білім беру саласына келетін болсақ, өңірде бөбекжай түріндегі балабақшалардың тапшылығы бар екені жасырын емес. Осы себепті жиын барысында әкімдерге балабақшалардың типтік ғимараттарын тікелей пайдалануға беру мүмкіндігін қарастыру тапсырылды.
Облыс басшысы бұл жетістіктермен тоқтап қалмай, жұмысты одан әрі жалғастыру қажеттігін атап өтті.
Өз тілшіміз
