Сыбайлас жемқорлыққа жол жоқ!
Шығыс Қазақстанда облыс әкімдігі басшылығының қатысуымен Сыбайлас жемқорлыққа қарсы іс-қимыл мәселелері жөнінде кеңейтілген кеңес өтті. Кеңесте «Сыбайлас жемқорлыққа қарсы саясат тұжырымдамасының» жобасы жан-жақты талқыланды.
Жиынға қалалар мен аудандар әкімдері, мемлекеттік және құқық қорғау органдары басшылары, депутаттар, бизнес өкілдері, квазимемлекеттік сектор басшылары, саяси партиялар, этномәдени бірлестіктер мен қоғам өкілдері қатысты.
Облыстық сыбайлас жемқорлыққа қарсы қызметтің басшысы Е.Жалмағамбет әзірленіп жатқан 2022-2026 жылдарға арналған ҚР Сыбайлас жемқорлыққа қарсы саясат тұжырымдамасы жайлы айтты.
Кеңеске қатысушылар нақты реформалар мен жобаларды қамтитын Тұжырымдама міндеттерінің 6 блогын талқылады. Олардың ішінде сыбайлас жемқорлыққа төзбеушілікті қалыптастыру, бизнеске корпоративтік әдеп арқылы сыбайлас жемқорлыққа қарсы әрекет ету, жауапкершіліктен бұлтартпауды қамтамасыз ету шараларын жетілдіру, сыбайлас жемқорлыққа қарсы іс-қимылда азаматтық қоғамның рөлін күшейту, сыбайлас жемқорлыққа қарсы саясат мониторингі, уәкілетті органның қызметін жетілдіру сияқты міндеттерді шешу бар.
«Тұжырымдамаға азаматтық қоғам, соның ішінде бизнес өкілдерінің ұсыныстары енгізілгенін атап өту маңызды. Стратегиялық құжатқа сіздердің ұсыныстарыңыз енгізілді, атап айтқанда, мемлекеттік сатып алудағы мемлекеттік компаниялардың үлестерінің қысқаруы, бір көзден сатып алу үшін негіздерді қысқарту және т.б.
Жаңа стратегиялық құжат сыбайлас жемқорлықтың алғышарттарын түбегейлі және кешенді жоюға бағытталған. Сана мен моральдық қағидаларды өзгертуге маңызды рөл берілді. Біздің мақсатымыз — қоғамда сыбайлас жемқорлыққа қарсы мықты иммунитетті қалыптастыру. Сыбайлас жемқорлық барлық адамдар үшін материалдық жағынан тиімсіз болатын жағдайлар жасайды», — деді Сыбайлас жемқорлыққа қарсы қызмет департаментінің басшысы.
Тұжырымдаманың негізгі бөлімдерін талқылау барысында бизнес-ортаға енгізілетін сыбайлас жемқорлыққа қарсы стандарттарды енгізу, қызметкерлерді сыбайлас жемқорлыққа қарсы оқыту, бизнес-әріптестердің тізілімін енгізу, комплаенс-офицерлерді даярлау, контрагенттердің адалдығын бағалау, бизнес-өнімдерді ерікті таңбалау, «таза толқын» белгісінің қызметтері және тағы да басқа сыбайлас жемқорлыққа қарсы жобаларға ерекше назар аударылды.
Баяндамаларды талқылау аясында кеңеске қатысушылар банк, мемлекеттік сатып алу және басқа да салалардағы сыбайлас жемқорлық тәуекелдерін жоюға қатысты бірқатар ұсыныстар мен ұсынымдарды атады.
Жиын соңында ШҚО әкімдігінің басшылығы Сыбайлас жемқорлыққа қарсы қызметтің бастамаларын қолдай отырып, жергілікті атқарушы органдар мен квазимемлекеттік сектор басшыларына бірқатар тапсырмалар берді.
ШҚО сыбайлас жемқорлыққа қарсы қызмет департаменті
