Шығыс Қазақстан облысында мемлекет басшысының тапсырмасы аясында әсіресе жастардың кәсіп ашуына жағдай жасалуда. Аймағымыз бойынша жаңадан кәсіп ашқысы келетін жастарға 606 грант берілген.
ШҚО Жұмыспен қамту және әлеуметтік бағдарламаларды үйлестіру басқармасы басшысының орынбасары Досхан Қайырғазиновтың айтуынша, өңірде «Еңбек» нәтижелі жұмыспен қамту бағдарламасы аясында бірқатар шаралар атқарылған.
— Осы ретте 29 жасқа дейінгі жастарға ерекше назар аударылды. Оларға техникалық және кәсіптік білім алуға мүмкіндік жасалған. Бүгінде облыс бойынша 4365 адам оқуын жалғастыруда. 1832 адам оқуын тәмамдап, оның 1712-сі жұмысқа орналастырылды. Бұл диплом алғандардың 93 пайызы, — дейді ол.
Досхан Қайырғазиновтың сөзінше, «Бастау Бизнес» жобасы бойынша кәсіпкерлік негіздеріне 362 адам оқытылған. Оның 212-сі NEET санатындағы жастар екен. Олар өз кәсіптерін жүргізіп қана қоймай, жаңадан қосымша жұмыс орындарын ашып, жұмыссыздар санын азайтуға да септеспек.
— Өткен жылы жастарға бизнес-идеяларын жүзеге асыруға 354 миллион теңгеге 606 грант берілген. Биыл Кәсіпкерлікті дамытудың 2021-2025 жылдарға арналған ұлттық жобасын іске асыру шеңберінде жастарға және азаматтардың әлеуметтік осал санаттарына кәсіп ашу үшін барлығы 1 138 грант беру жоспарланып отыр. Оның ішінде 581 грант жастарға беріледі, — дейді облыстық Жұмыспен қамту және әлеуметтік бағдарламаларды үйлестіру басқармасы басшысының орынбасары.
Кәсіпкерлікті дамытуға бағытталған шаралардың барлығы облыс әкімі Даниал Ахметовтың назарында тұр.
Сөз орайында айта кетелік, ҚР Президенті Қасым-Жомарт Тоқаевтың мемлекеттік бағдарламаларды ұлттық жобаларға трансформациялау жөніндегі тапсырмасы аясында түрлі бағытта жобалар кешені әзірленді. Соның бірі — Кәсіпкерлікті дамытудың 2021-2025 жылдарға арналған ұлттық жобасы. Аталған жоба кәсіпкерлік белсенділікті арттыруға, кәсіпкерлердің өсуін жеделдетуге, жаңа нишаларды қалыптастыруға, сонымен қоса бәсекелестікті дамытуға бағытталып отыр.
Былтыр Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасын іске асыру мерзімі аяқталған болатын. Осыған орай, Кәсіпкерлікті дамытудың 2021-2025 жылдарға арналған ұлттық жобасы жүзеге асырыла бастады.
Азамат ЕРСАЙЫН,
«Семей таңы»
