Облыс әкімі Даниал Ахметов ауруханалардың бас дәрігерлерімен, Денсаулық сақтау басқармасы мен Семей медициналық университетінің мамандарымен кеңес өткізіп, ШҚО клиникаларында жоғары технологиялық медициналық процестерді енгізу мүмкіндігін талқылады.
Аймақ басшысы Семей медициналық университеті ректоратының үлкен жұмыс атқарғанын атап өтті. Даниал Кенжетайұлының айтуынша, қазіргі уақытта денсаулық сақтаудың әр түрлі салаларында жоғары технологиялық медициналық операциялардың қосымша 38 түрін жасауға мүмкіндік бар. Бірінші кезекте бұл трансплантология, қазір облыста ағзаларды ауыстырып салуға кезекте 266 адам тұр, оның ішінде 244-і бүйрек трансплантациясын қажет етеді.
«Жаңа технологиялардың арқасында біз мұндай операцияларды өзімізде жүргізе аламыз, яғни адамдарға шетелге шығудың қажеті жоқ. Сондай-ақ нейрохирургияда жоғары медициналық процедуралардың қосымша 7 түрін енгізуге мүмкіндігіміз бар, атап айтқанда, бұл омыртқа операцияларына қатысты. Операциялардың жаңа түрлерін балалар кардиохирургтері мен онкологтері игереді.
Гематологияға келетін болсақ, әлемде жүректің ишемиялық ауруы, бауыр циррозы және басқа да ауыр ауруларды емдеу үшін бағаналы жасушаларды трансплантациялау технологиясы кеңінен қолданылатынын бәрі біледі. Өңірде гематология орталығының құрылысы жүріп жатыр, оның базасында зертхана жұмыс істейтін болады, онда ғалымдар мен студенттер өз зерттеулерін жүргізе алады», — деп жазды аймақ басшысы инстаграм әлеуметтік желісіндегі жеке парақшасында.
Сондай-ақ гинекология саласында ЭКҰ операцияларының санын арттыру жоспарланып отыр, соңғы жылдары олардың саны 10-нан 800-ге дейін өскен (бұл тек квоталар бойынша). Сондай-ақ ортопедияда, травматологияда, оториноларингологияда пайдаланылатын болады. Бұл аймақ медицинасын дамытудың жаңа кезеңіне шығаруға мүмкіндік береді.
Жиында облыс басшысы жол картасы әзірленетінін айтты, онда процестердің қандай ауруханаларда енгізілетіні, қосымша сатып алатын жабдықтар және қай дәрігерлер үздік әлемдік клиникаларға оқуға баратыны нақты жазылатын болады.
— Біз ауруханалар мен медициналық орталықтарды ең озық және сапалы жабдықтармен жабдықтадық, енді жаңа деңгейге шығуымыз керек, — деді Даниал Ахметов.
Анар АХМЕТҚАЛИЕВА,
«Семей таңы»
