Өткен аптада Семей қаласы мәслихатының кезектен тыс, 22-ші сессиясы өтті.
Сессияда қаралған бірінші мәселе бойынша Семей қаласының жерлерін аймақтарға бөлу схемалары бекітілді. Қазақстан Республикасы Жер кодексінің 8-бабына сәйкес, жерді аймақтарға бөлу бағалау аймақтарының шекараларын және жер телімі үшін төлемақының базалық ставкаларына түзету коэффициенттерін айқындау мақсатында жүргізіледі.
Семей қаласының аумағын аймақтарға бөлу қаланың Бас жоспарын сондай-ақ рента құраушы факторларды (орталықтан қашықтығы) ескере отырып орындалды (қала, инфрақұрылым, абаттандыру, экологиялық жағдай).
Орындалған жұмыстардың нәтижесінде, Семей қаласында мынадай сипаттамалары бар жеті аймақ белгілеу ұсынылды:
— 1-ші аймақ қаланың сол және оң жағалауының орталық аудандары, сондай-ақ Қарағайлы тұрғын ауданын қамтитын үш жолақты телімнен тұрады;
— 2-ші аймақ бірнеше ірі шағын аудандардан тұрады. Орталық аудандарға жақын орналасқан 20, 35, 72, 342, 343, 410- кварталдар, темір жол ауданы, темір жол вокзалы, татар өлкесі. Сондай-ақ Ертіс өзенінің екі жағалауында орналасқан аймақта екі жолақты телім бар;
— 3-ші аймақ жеке тұрғын үй құрылысы шоғырланған аудандарды қамтиды. Оған оң және сол жағалауда екіден 4 жолақты учаске кіреді. Мысалы, Мирный 1-ші шағын аудан, Затон, Пристань сияқты бірқатар шағын аудандар, Лодочный, Восточный кенті, Красный кордон, Жоламан, Комсомол кенті, Нахаловка және т.б. ұсынылған;
— 4-ші аймаққа Степной кенті, Мұрат, Жарқын ауылы сияқты шалғай тұрғын алаптары, болашақтағы Жібек Жолы және Суықбұлақ шағын тұрғын аудандары ұсынылды;
— 5-ші аймақ барлық саяжай алаптарын қамтиды: Мирный алабы, Шығыс сол жақ, Шығыс оң жақ, Согра, құс үйі, Грязнуха, Большой а., Мұрат, Водный, Бобровка;
— 6-шы аймақ қаланың барлық өнеркәсіптік аймақтарын қамтиды. Мысалы: батыс және солтүстік өнеркәсіптік тораптары, кеме жөндеу зауыты, әуежай ауданы, құс фабрикасы ауданы, «Таймас» ауданы, жобаланатын ЖЭО-3 құрылысының аумағы сияқты барлық өнеркәсіптік аймақтарын қамтиды;
— 7-ші аймаққа ерекше қорғалатын табиғи аумақтардың жерлері, сауықтыру, рекреациялық және тарихи-мәдени мақсаттағы жерлер, ландшафт аумағы және Бейбітшілік аралының аумағы кіреді.
Осылайша Семей қаласының аумағы 7 аймаққа бөлінген. Онда тіршілік ету объектілері олардың функционалдық тағайындауларына байланысты шоғырланған. Бірнеше ұқсас аймақтарды бір аймаққа біріктіру арқылы қолданыстағы 38 аймақтың саны 7-ге дейін азайды.
Сессияда екінші мәселе ретінде 2022 жылғы 24 қаңтардағы № 2 және 2022 жылғы 31 қаңтардағы № 7 Семей қалалық аумақтық сайлау комиссиясы Қайрат Қанатұлы Смағұлов, Бауыржан Қайрамбаев, Рафаил Хазипов, Дулат Қажмұханбет, Айдос Қисаменовтың өкілеттігін мерзімінен бұрын тоқтату туралы ұсынысы қаралды. Көпшілік дауыспен аталған депутаттардың өкілеттігі тоқтатылды.
А.ЕРСАЙЫН
