Семей көшелеріне орташа жөндеу жүргізу үшін 300 млн теңге қажет. Бұл туралы аймақтық коммуникациялар қызметінде өткен баспасөз мәслихатында Семей қаласының жолаушылар көлігі және автомобиль жолдары бөлімінің басшысы Ерлан Уәлиев мәлім етті.
– Өткен жылы республикалық маңызы бар РФ шекарасы (Омбы) — Майқапшағай автожолы құрылысының жобасы бойынша техникалық – экономикалық негіздеме әзірленді.
2021 жылдың наурыз айында оң сипаттағы қорытынды алынды. Бас жобалаушы — “Жол-көлік кешенінің басшы қызметкерлерінің біліктілігін арттыру институты”ЖШС техникалық-экономикалық негіздеме әзірлеу құны 55 млн теңгені құрады, – деді Ерлан Уәлиев.
Бас жоспарға сәйкес қаланың батыс жағында ұзындығы 51,5 шақырым айналма жол салу қарастырылған. Онда 6 жол айрығы, 3 көпір және 2 жол өтпесі болады. Айналма жолдың құрылысына 82 млрд теңге қаржы қажет. Құрылыс бойынша жобалық-сметалық құжаттаманы әзірлеу үшін Индустрия және инфрақұрылымдық даму министрлігінің Автомобиль жолдары комитетіне жіберілді.
Баспасөз мәслихатында жер үсті өткелінің құрылысы туралы да айтылды.
– Жобаланған жаяу жүргіншілер көпірінің ұзындығы 58 метрді құрайды. Жоба құны – 133,215 млн теңге. Қазіргі уақытта ақшалай қаражат бөлу сұралады. Сондай-ақ Өскемен көшесін (Шайжүнісов көшесінен 6 линия көшесіне дейін) күрделі жөндеуден өткізу жоспарлануда. Жол учаскесінің ұзындығы 2 шақырымды құрайды. Оның құны – 1122,6 млн теңге. Байқау ағымдағы жылдың 30 наурызында аяқталады, – деп түйіндеді сөзін Ерлан Уәлиев.
Жиын барысында жолаушы тасымалы мәселесі де сөз болды. Бүгінгі таңда жолаушы тасымалында 3 автопарк қызмет көрсетеді. Күн сайын көлік қозғалысының мониторингісін Семей қаласының ЖТБО мамандары қадағалап отырады.
– Бүгінгі таңда қалалық маршруттарға үш автопарк қызмет көрсетеді. Олар 13 бағытқа қызмет көрсететін “Таксомотор паркі” ЖШС, 3 бағытқа қызмет көрсететін “Семавтопарк” ЖШС және 23 маршруты бар “Авто Транс Семей” ЖШС. Мониторинг “Bus Report” диспетчерлеу бағдарламасының көмегімен жүргізіледі. Қала тұрғындары “Infobus” мобильді қосымшасы арқылы қажетті бағытты қадағалай алады. Өткен жылы 34 603 684 жолаушы тасымалданды, оның ішінде 3 169 249 жолаушының жеңілдіктері бар, – деді Семей қаласының жолаушылар көлігі және автомобиль жолдары бөлімінің жолаушылар тасымалы секторының меңгерушісі Назым Жанболатова.
Бүгінгі күні қаладағы қоғамдық көліктерде жол жүру үшін бірыңғай төлем жүйесі орнатылмаған. 2020 жылдың 20 қаңтарынан бастап билеттеудің электрондық жүйесі енгізілген болатын. Алайда оған “Таксомотор паркінің” 13 автобусы ғана қосылған. Болашақта олар бірыңғай электронды төлем жүйесін орнататын болады. Сол сияқты аялдама орындарының мәселесі де шешілуде.
– Бүгінгі таңда Семейде 507 аялдама бар. Оның 326-сы – әр түрлі типтегі аялдама. Соңғы үш жылда қалада 50 – ден астам жаңа аялдама орнатылды, – деп қорытындылады сөзін Назым Жанболатова.
Өз тілшіміз
