Өткен аптаның соңында Семей қаласының әкімі Бақытжан Байахметов шаһардағы мүмкіндігі шектеулі балалары бар отбасылармен, сондай-ақ жалғыз басты зейнеткерлермен кездесті.
Қала басшысы мүгедек балалардың ата-аналарымен бұған дейін де бірнеше рет кездескен болатын. Сондықтан да, Бақытжан Кәкенқажыұлы алдымен жиналғандарды алдыңғы кездесулерде берілген тапсырмалардың орындалуы туралы хабардар етті. Шаһар басшысы айтып өткендей, бүгінгі таңда қалада 3586 мүгедек бала бар. Оның ішінде екі мыңнан астамы мемлекет пен демеушілер есебінен түрлі оңалту емшараларын алған. 83 бала санаторлық-курорттық емдеуден өтіпті. Атаулы әлеуметтік көмекті мүгедек балалары бар 58 отбасы, тұрғын үй көмегін тоғыз отбасы алады екен.
Бақытжан Кәкенқажыұлының айтуынша, лімет қазіргі таңда қала бойынша 7-18 жас аралығындағы 246 мүгедек бала үйде білім алады. Оларға қолайлы жағдай жасалған. Мемлекет тарапынан үлкен қолдау көрсетіліп отыр.
Семей қаласының арнаулы әлеуметтік қызмет көрсету орталығында 411 мүгедек азаматтарға қызмет көрсетіледі. Оның ішінде 18 жасқа дейінгі 258 мүгедек балаға, жартылай стационар жағдайында 40, қалған 218 балаға, бейімделген шағын үй-жайдың тарлығына байланысыты, үйде қызмет көрсетуге мәжбүр. Аталған орталықта 18 жастан асқан 153 бала кезінен мүгедек азаматтар қызмет алады, барлығының диагнозы -психоневрологиялық аурулар.
Қазіргі таңда, облыс әкімі Даниал Ахметовтің тапсырмасы бойынша, Қарағайлы шағын ауданында 150 орындық мүгедектерге арналған оңалту орталығының құрылысы жүргізілуде. Сонымен қатар «Қамқор» қоғамдық қоры есебінен бұрынғы үшінші перзентхана базасында жүз адамға арналған оңалту орталығы ашылады. Ал 35 кварталда жақын арада 50 орындық «Балғын» мүгедек балаларға арналған оңалту орталығы жұмыс істей бастайды.
Бұл шаралар сыртында әлеуметтік тапсырыс есебінен шағын және орта бизнес өкілдері де үлкен көмек көрсетеді. Мәселен, 61 баланы қамтитын «Тоқтамыс» жеке оңалту орталығын, INVITRO клиникасы мен «Жарқын болашақ» қоғамдық бірлестігін атауға болады.
Дегенмен қала әкімінен жәрдем сұрайтындар көп. Мәселен, соңғы уақытта қала әкімінен 86 мүгедек баланың ата-анасы көмек сұрапты. Барлығының мәселелері оң шешімін тапты. 53 бала арнаулы әлеуметтік қызмет көрсету орталығына бекітілген. Қалғандарын жеке қоғамдық бірлестіктер өз қамқорлығына алды.
Жиында Семей қаласының әкімі Бақытжан Байахметов мүмкіндігі шектеулі балаларға тұрғын үй бөлу жұмыстары туралы да айтып өтті.
— Мемлекеттік тұрғын үй қорынан тұрғын үй алу кезегінде мүгедек балаларды тәрбиелеп отырған 509 отбасы тұр. Мүгедек балалары бар немесе тәрбиелеп отырған отбасылар үшін мемлекеттік тұрғын үй қорынан тұрғын үй алудың екі нұсқасы бар: сатып алу құқығынсыз кезектілік тәртібімен жалға берілетін тұрғын үй және «Бақытты отбасы» мемлекеттік бағдарламасына қатысу. Аталмыш бағдарлама аясында, қатысушылар тұрғын үйді бастапқы нарықта да, екінші нарықта да сатып ала алады. Қазіргі уақытта Комсомол кентінде «Бір қабатты Шығыс» бағдарламасы бойынша жеке тұрғын үйлердің құрылысы аяқталуда. «Бақытты отбасы» бағдарламасына қатысушылар да өз үйлерін осы баспаналардан таңдай алады.
— Соңғы жылдары «Бақытты отбасы» бағдарламасы аясында мүгедек балаларды тұрғын үймен қамтамасыз етуде оң динамика байқалып отыр. 2019 жылы бір ғана отбасы үй алса, алдыңғы жылы 22 отбасы, ал өткен жылы 63 отбасы баспана алды. Тұрғын үймен қамтамасыз ету шаралары алдағы уақытта жалғасады, — деді Бақытжан Байахметов.
Кездесуде ата-аналар қала әкімінен мүмкіндігі шектеулі жандардың бірқатар мәселелерін шешуге қолдау көрсетуін сұрады. Мәселен, мүгедек балалар үшін сегіз жарым миллион теңгеге әлеуметтік педагогтардың жаңа бос жұмыс орындарын ашу қажет. Ал егде жастағы жалғыз басты мүгедектерге қызмет көрсету үшін 14 миллион теңге көлемінде қаржыландыру қажет. Екі ұсыныс та қала әкімінен қолдау тапты.
— Экономика бөліміне қаражатты жергілікті бюджеттен қарастыруды тапсырамын. Мұндай кездесулер бір-бірімізді жақсы түсінуге көмектеседі. Бір кездесуде барлық мәселелерді шешу мүмкін емес. Бірақ, сіздермен бірге алдымызға қойылған міндеттерді кезең-кезеңімен шешетін боламыз, — деді Бақытжан Байахметов.
Кездесу қорытындысы бойынша, жұмыспен қамту, әлеуметтік бағдарламалар және азаматтық хал актілерін тіркеу бөліміне мүгедек балаларды санаторлық-курорттық емдеумен қамтамасыз ету мәселесін шешуге байланысты ұсыныстарды дайындау, дене шынықтыру және спорт бөліміне мүгедек балалардың қаланың бассейндері мен шаңғы базаларына тегін бару мәселесін шешу тапсырылды.
Анар АХМЕТҚАЛИЕВА,
«Семей таңы»
