Семей қалалық мәслихаты депутаттары қалалық және ауылдық округтерді аралап, халықпен жүздесуде.
Семей қаласының әкімі Бақытжан Байахметов қалалық және облыстық мәслихат депутаттарымен жиын өткізді.
Кездесуде Семей қаласы мен ауылдық округтердің әлеуметтік-экономикалық даму жоспары талқыланды.
— Әрбір депутат өзінің сайлау округі бойынша халықтың әлеуметтік осал топтары жайлы, қажетті инфрақұрылым туралы барлық ақпаратты білуі тиіс. Тұрғындарға барлық жоспарланған жобаларды: сумен жабдықтау, жол құрылысы бойынша барлық цифрларды егжей-тегжейлі түсіндіру қажет», — деді Бақытжан Байахметов.
Қала әкімдігі депутаттар үшін арнайы таратпа материалдар әзірледі. Онда ағымдағы жылға қатысты әрбір елді мекеннің дамуы туралы толық ақпарат бар. Соңғы уақытта балалар және спорт алаңдарын салуға ерекше сұраныс байқалып отыр. Тұрғындар қала әкіміне ауылдарға кірме жолдар салу мәселелері бойынша да жиі хабарласады. Бұған қатысты жобалардың көпшілігі қала бюджетінде ескерілген. Барлық құжаттарды дайындау бойынша үлкен жұмыс атқарылды. Қала басшысы әрбір жобаға қаражат салынғанын және жүргізіліп жатқан жұмыстың сапасын одан әрі бақылау үшін тұрғындарды жан-жақты хабардар ету қажеттігін атап өтті.
— Кім қандай партияда болмасын, барлығымыз сайлаушылармен кездесулерді барынша тиімді өткізуіміз керек. Халыққа жүргізіліп жатқан жұмыстың мәнін түсіндіру маңызды. Мен сіздерге орындалған жұмыстың сапасын бақылайтын бірлескен жұмыс органын құруды ұсынамын. Оған қоғамдық белсенділерді де, жергілікті атқарушы билік өкілдерін де, қалалық және облыстық мәслихаттардың депутаттарын да міндетті түрде қосу қажет», — деді Бақытжан Байахметов.
Сондай-ақ депутаттарға тұрғындардың мәселелерін мұқият қарап, сайлаушылармен жиі кездесулер өткізу ұсынылды.
Осы кездесулердің нәтижелері бойынша, бюджетті нақтылау кезінде қала мен округтердің ағымдағы және кейінгі жылдарға арналған даму жоспарына толықтырулар енгізілетін болады.
Жиында сондай-ақ әлеуметтік маңызы бар азық-түлік өнімдері бағасының негізсіз өсуін анықтау мақсатында құрылған мониторингтік топ құрамындағы депутаттардың жұмысы талқыланды.
Депутаттар бағаның барлық тізбегін бақылау үшін көтерме жеткізілімдерге де мониторинг жүргізуді ұсынды. Қала әкімі бұл ұсынысты қолдады.
Кездесу қорытындысы бойынша, қала әкімінің тапсырмасымен депутаттардың сайлаушылармен кездесуінің толық кестесі баспасөзде және басқа да бұқаралық ақпарат құралдарында жарияланатын болады. Бұл аудан тұрғындарын депутаттармен кездесулердің қайда және қашан өткізілетіні туралы барынша ақпараттандыруға көмектеседі. Кездесулерге депутаттардан басқа, міндетті түрде қалалық әкімдіктің және ауылдық округтердің жауапты қызметкерлері қатысады. Олар сайлаушылардың барлық сұрақтарына жауап беруге дайын болуы керек.
Семей қалалық ішкі саясат бөлімі
