Өткен аптада облыс әкімі Даниал Ахметов жұмыс сапарымен Аягөз ауданына барып қайтты. Сапар барысында аймақ басшысы қала, кент, ауылдық округтердің қоғамдастық мүшелерінің және облыстық, аудандық мәслихат депутаттарының қатысуымен жиын өткізді. Жиында аудан әкімі С.Ысқақовтың өңірдің әлеуметтік-экономикалық дамуы жөніндегі есебі тыңдалып, биылғы жылға жоспарланған жұмыстар таныстырылды.
Аягөз ауданы көптеген көрсеткіштер бойынша көш бастап тұр. Атап айтқанда, өткен жылдың өзінде ғана 170-тен астам отбасы, оның ішінде көп балалы және аз қамтылған отбасылар баспаналы болды. Құрылыс қарқыны қазір де сақталып отыр. Бүгінгі таңда екі 60 пәтерлі несиелік тұрғын үй салынып жатыр.Ауданда білім сапасын арттыруға да көп көңіл бөлініп отыр. Биыл 600 орындық мектеп құрылысы қолға алынбақ. Өткен жылы 21 мектеп, 4 балабақша ағымдағы жөндеуден өткен. Балаларды мектепке дейінгі біліммен және тәрбиемен қамту 96 пайызды құрап отыр.
Облыс басшысы жергілікті жұртшылықтың ұсыныс-тілектерін тыңдап, оларды толғандырып жүрген сұрақтарына жауап берді.
— Осы жылы Аягөз қаласында екі көшеге интернационалист жауынгерлердің есімін беру жоспарланып отыр. Ауған соғысы ардагерлеріне үлкен құрметпен қараймын, біз әрдайым көмек пен қолдау көрсетуге дайынбыз,- деп жауап берді Даниал Ахметов тұрғындардың өтінішіне орай.
Жиында тұрғындар тарапынан жайылымдарды ұлғайту мәселесі де қозғалды. Аймақ басшысы бұл мәселе тұрақты бақылауда екенін айтып өтті.
— Облыстың бос және пайдаланылмай жатқан жерлерінің басым бөлігі жайылым мен ауыл шаруашылығына қайтарылды,- деді.
Жергілікті кәсіпкер мемлекеттік-жеке меншік әріптестік аясында жаңа шағын ауданда балабақша салу туралы ұсынысын айтты. Аймақ басшысы бұндай ұсыныстарды қуана қолдайтыны айтып, жақын арада жоба қарастырылатынын жеткізді.
Ауданда спорт орталықтарын салу бойынша жобалар бар, жолдар мен көшелерді жөндеу жұмыстары жалғастырылады, сондай-ақ агробизнестегі жобалар да өз жалғасын табады.
— Жалпы, Аягөз ауданының даму қарқыны қуантады, бұл динамика алдағы уақытта да сақталады деп ойлаймыз,- деді аймақ басшысы.
Анар АХМЕТҚАЛИЕВА,
«Семей таңы»
