Өткен аптаның соңында Семей қаласында тағы бір көше жарықтандырылды. Енді шаһардың Промузел ауданындағы Западная көшесі түнгі мезгілде жарқырап тұратын болды.
Аталған көшенің бойында ондаған түрлі кәсіпорындар бар. Өткен күзде қала әкімі Бақытжан Байахметов осы аудан тұрғындарының бастамашыл тобымен кездескен болатын. Сол кездесуде тұрғындар мен кәсіпорындардың қызметкерлері мұнда жарық орнатып, жолды жөндеу және аумақты абаттандыру туралы өтініштерін айтқан еді. Тұрғындардың сол тілегі ескерусіз қалған жоқ. Ақпан айынан бастап осы бағытта алғашқы қадам жасалды.
Западная көшесінде, жалпы, 35 тірек және 37 шам мен кронштейндер орнатылды. Екі шақырымға жуық электр сымы тартылды. Аталған аумақ Рысқұлов көшесінен Глинки көшесіне дейін толықтай жарықтандырылды.
Ауа-райына, аязға, жердің тоңына қарамастан, жұмысын кестеге сәйкес жалғастырып жатқан біздің энергетиктерге алғыс білдірген жөн болар еді. Олардың ерен еңбектерінің арқасында, биылғы жылдың басынан бері қаланың оннан астам көшесі толығымен жарықтандырылды.
«Қазір біз қала көшелерінде орнатып жатқан 130 Вт шамдар «ақылды» деп аталады. Олардың жарығын қараңғы уақыттың ұзақтығына байланысты біртіндеп реттеуге болады. Ал болашақта бірыңғай диспетчерлік орталық арқылы жарықтандыру жүйесі қашықтықтан басқарылатын болады. Шамдарды қосу және өшіру кестесін ыңғайлы етіп құру арқылы энергияны үнемдеуге және әр шамды бақылауға мүмкіндік болады.
Семейдегі көше жарығын жаңғырту жобасы аяқталғаннан кейін қала бойынша электр энергиясы 60% — ға дейін үнемделеді деп күтілуде», — деп жазды өзінің фейсбук әлеуметтік желісіндегі жеке парақшасында қала әкімі Бақытжан Байахметов.
Сөз соңында айта кетер болсақ, бүгінгі таңда Семей қаласы бойынша барлығы 1184 көше бар. Қазіргі күні қалада 158 көше жарығы бар. Наурыз айының соңына дейін 185 көшені жарықтандыру жоспарланып отыр.
Өз тілшіміз
