Облыс әкімі Даниал Ахметов облыстағы әлеуметтік нысандар құрылысы мен оларды салу жоспары бойынша кеңес өткізді.
Жиын басында аймақ басшысы өткен жылдың өтпелі жобалары барын, олардың міндетті түрде аяқталатын айтты. Облыс басшысының айтуынша, республикалық комиссия Шығыс Қазақстан өнеркәсіп саласындағы қазақстандық қамту бойынша жетекші орында екенін атап өткен. Аталмыш көрсеткіш 75 пайызды құрайды.
— Әлеуметтік нысандарға келер болсақ, биыл Өскеменде студенттік жатақхана, Риддерде мектеп, Қайнар, Таврия және Бозанбай ауылдарында, Тарбағатай ауданында дене шынықтыру-сауықтыру кешендерінің құрылысын аяқтаймыз. Биыл Өскемендегі Абай даңғылындағы медициналық орталықта қабылдау бөлмесін қайта құру және диагностикалық бөлімшені жаңғырту басталады, — деді Даниал Кенжетайұлы.
Халықты ауыз сумен қамтамасыз ету саласында да көптеген жобаларды іске асыру жоспары бар. Красина кентінде су құбыры желілерінің құрылысы бойынша жұмыстар аяқталуға жақын. Блокты-модульді станциялар Жаңа Шүлбі мен Шалқарда салынатын болады. Үржар ауданында су құбыры желілері құрылысының үшінші кезегі басталды. Осы орайда шығысқазақстандықтардың өмір сүру сапасына қатысты мәселелердің барлығы тұрақты бақылауда екенін айтып өткен жөн. Семей өңірін дамыту мәселесі де аймақ басшысының назарында тұр. Оқырмандардың есіне сала кетсек, Семей қаласы бойынша барлығы 50-ден астам жобаны, оның ішінде көшелер мен жолдарды, ең алдымен, қоғамдық көлік бағыттары өтетін жерлерді жөндеу жоспарланған. Сондай-ақ, қала тұрғындарының көптеген өтініштері бойынша автокөпір мен «Спартак» стадионын қайта жаңғырту жоспарлануда. Семейді айналып өтетін 51,5 шақырым жолдың құрылысы да межеленеген.
Тұрғын үй құрылысына да ерекше көңіл бөлінетін болады. Биылғы жылы «Бір қабатты Шығыс» бағдарламасы бойынша 440 мың шаршы метрден астам тұрғын үй пайдалануға беріліп, 43 үй салынады. 16 спорт және ойын алаңдары орнатылып, 35 аула жөнделеді. Жылу магистралін жөндеу, абаттандыру, «Сергек» камераларын орнату және көшелерді жарықтандыру жұмыстары жалғасын табады.
Азамат ЕРСАЙЫН,
«Семей таңы»
