Облыс әкімі Даниал Ахметов арнайы жұмыс сапарымен Алтай ауданына барып қайтты. Аудан басшылығының өткен жылы атқарған жұмысының есебін тыңдап, жергілікті жұртшылықпен кездесу өткізді.
Жалпы Алтай ауданы агросектор саласында, атап айтқанда күнбағыс, рапс және басқа дақылдарды өсіруде облыс бойынша жетекші орын алады. Сонымен қатар мал шаруашылығында да көрсеткіштер жаман емес. Өткен жылы ТҮКШ саласында бірнеше жоба іске асырылыпты, жолдарды жөндеу, көшелерді жарықтандыру және жылумен жабдықтау бағытында жетістіктер бар.
Сонымен қатар аудан басшылығы атап өткендей, қазіргі таңда бірқатар елді мекендерде су тасқынының алдын алуға қатысты нақты іс — шаралар өткізілуде.
Дегенмен аймақ басшысы жергілікті тұрғын үй құрылысы саласында кемшіліктер бар екенін айтып, бұған назар аудару қажеттігін ескертті.
«Біз үшін басты міндет — «Ертіс» ӘКК құрамына берілген қала үшін маңызды «Серебрянск бейорганикалық өндірістер зауытын» жандандыру. Бұрынғы аудан орталықтарын дамытудың облыстық бағдарламасына енген бұл қаланың дамуына инфрақұрылымды жақсарту үшін қомақты қаражат салудамыз. ДСК сияқты әлеуметтік нысандар салып, биылғы жылы мәдени — демалыс орталығы болатын зауыттың әкімшілік ғимаратын қайта құру басталады. Халықпен кездесуде гемодиализ туралы мәселе көтерілді. Жақын арада Алтайда осындай бөлімше ашылады. Биыл Алтай мен Аягөз өңірінің екі қаласында заманауи фитнес орталықтардың құрылысын бастаймыз. Бұл туралы жас жігіттер кездесулерде сұрады», — деп жазды Даниал Кенжетайұлы өзінің фейсбук әлеуметтік желісіндегі жеке парақшасында қалдырған жазбасында.
Сондай-ақ облыс басшысы аймағымыз бен еліміз үшін маңызды энергетикалық жоба — Тұрғысын ГЭС құрылысының екінші кезегі басталғанын атап өтті.
Әлібек КЕМЕЛХАН,
«Семей таңы»
