Nur Otan партиясы Семей қалалық филиалының төрағасы, қала әкімі Бақытжан Байахметов азаматтарды жеке сұрақтары бойынша қабылдады.
Семей қаласының тұрғындары Алла Домаева мен Людмила Рогалева Құтжанов көшесіндегі «TOҚТА» белгісін алып тастап, сол көшеден Гагарин көшесіне қарай автокөліктерге және № 34 маршруттық автобусқа жүруге рұқсат беруді сұрады.
Қабылдау қорытындысы бойынша азаматтарға ҚР заңнамасы аясында түсініктемелер беріліп, бұл мәселе оң шешімін табатыны айтылды. Құтжанов көшесі бойындағы учаскені кеңейтуге жобалық-сметалық құжаттама әзірлеуге қаржыландыру осы жылы көзделген.
Жолаушылар көлігі және автомобиль жолдары бөліміне сондай-ақ осы жылы жолаушыларды тасымалдау ережелері аясында, осы көше бойынша автобустардың бір жақты қозғалысын ашу мәселесін қарау тапсырылды. Ал келесі жылы маршруттық автобустардың екі жақты қозғалысының ашылуын қарастыру қажет.
Nur Otan партиясы Семей қалалық филиалының төрағасына қаржылай көмек көрсетуді сұрап бес баланың анасы Сәуле Вахитова жүгінді. Ол Шығыс кентінің Б кварталындағы үйдегі ылғалдылыққа шағымданды. Оның айтуынша, үйге жөндеу жүргізу қажет. Жұмыспен қамту бөлімінің ақпараты бойынша, Сәуле Вахитова 2019 жылдың маусым айынан бастап мемлекеттік атаулы әлеуметтік көмек алып келеді. 2022 жылдың ағымдағы тоқсанында отбасыға АӘК аясында 127 290 теңге (айына 42 430 теңге) мөлшерінде көмек тағайындалған. Қабылдау барысында оған «Тұрғын үй қатынастары туралы» заңнама аясында түсініктемелер берілді. Қала әкімі тұрғын үй инспекциясы бөлімінің басшысына өтініш берушіні жеке қабылдауды, оның тұратын жеріне барып, мәселені жан-жақты зерттеуді тапсырды. Үйде апаттық жағдай туындаған жағдайда комиссия құрып, заңнама аясында қолдау шараларын қабылдауды тапсырды.
Қабылдауға келген ерлі-зайыпты Қанат пен Айнұр Әлібековтер бес баланы тәрбиелеп отыр, олардың өз баспаналары жоқ. Отағасы «Теплокоммунэнерго» мекемесінде абоненттермен жұмыс жөніндегі менеджер болып жұмыс істейді. Бұл отбасыға жұмыспен қамту бөлімі тарапынан ағымдағы жылдың қаңтар айында 80 000 теңге мөлшерінде біржолғы әлеуметтік көмек көрсетілген. Отбасы 2021 жылдың 14 қаңтарынан бастап, «көпбалалы отбасы» санаты бойынша тұрғын үй кезегінде тұр, кезек нөмірі 606. Жоғарыда атап өткен заңнаманың 74 — бабына сәйкес, бұл жанұяға тұрғын үй кезек бойынша беріледі.
Қабылдау барысында Әлібековтер отбасына 2 — тоқсанда АӘК-ке құжаттарын тапсыру ұсынылды. Сондай-ақ тұрғын үй инспекциясы бөліміне өтініш берушілердің төлем қабілеті болған жағдайда «Бақытты отбасы» бағдарламасы аясында тұрғын үй сертификатын беру мәселесін қарау тапсырылды.
Бақытжан Байахметов тұрғындарды қабылдау барысында әрбір жүгінген адамға олардың өтініштері бойынша толық түсініктемелер беріп, мәселелерді шешу жолдарын айтты. Қабылдауда болған азаматтардың мәселелері жеке бақылауға алынды.
Айта кетейік, «Nur Otan» партиясының азаматтарды жеке мәселелері бойынша қабылдауы ай сайын жүргізіледі. Бұл келіп түскен шағымдарды талдау және оларды жедел шешуде қала тұрғындарымен тиімді жұмыс істеу тәсілдерінің бірі.
Семей қалалық ішкі саясат бөлімі
