Өткен аптада Семей қаласының әкімі Бақытжан Байахметов Бобровка кенті тұрғындарының бастамашыл тобымен кездесіп, ұсыныс-тілектерін тыңдады.
Бобровка кентінде бүгінгі күні 3 мыңнан астам адам тұрады. Алғашында саяжай кооперативі ретінде кұрылған бұл елді мекен кейіннен 400 түттіні бар ірі кентке айналды. Қала шетінде орналасқан кент жылдам өсіп келе жатқандықтан, тұрғындарының әлеуметтік сұраныстары да жылдан-жылға артып келеді.
Кездесуде тұрғындар қала әкіміне балабақшаның жоқтығы қиындық тудырып отырғанын жеткізді.
— Балаларымыз алыстағы балабақшаларға барады, немесе күні бойы үйде болады. Ата-аналар жұмыс істеудің орнына барлық уақытын балаларымен өткізуге мәжбүр, — деді тұрғындардың Әлия Қанафина.
Бақытжан Байахметов аталған мәселе жайлы білетінін, қазіргі күні оны шешу үшін шаралар қабылданып жатқанын айтты. Мемлекеттік-жекеменшік серіктестік аясында, Бобровкада 320 орындық балабақша құрылысы жоспарланған. Құрылыс салушыға Строительная, 57 көшесі бойынан 1,2 га жер учаскесі бөлінді, өткен жылдың күзінде жобалық-сметалық құжаттаманы әзірлеуге шарт жасалды.
— Жақында аталған жұмыс аяқталады. Наурыз айының басында жоба сараптамаға жіберіледі. Сараптама нәтижелері мамыр айында дайын болады деп күтілуде. Құрылыс жұмыстары биылғы жылға жоспарланған, — деді Бақытжан Байахметов.
Кент тұрғындары сондай-ақ балалар және спорт алаңының жоқтығын айтып шағымданды. Жергілікті №44 мектептің аумағында жабық шағын футбол алаңы бар. Бірақ, тұрғындардың айтуынша, мектеп басшылығы аталған алаңды жауып тастап, балаларды ішке кіргізбейді.
Қала әкімі тұрғындармен бірге мектеп аумағына барды. Мектеп директорының міндетін атқарушыға балалар үшін спорт алаңын ашу тапсырылды. Осы жерде балалар үшін ғана емес, барлық кент тұрғындары үшін де балалар ойын алаңы мен спорт бұрышын салу мәселесі оң шешімін тапты.
— Балалар мен спорт алаңын мектеп аумағында орналастыруға болады. Бір жақсысы бұл жер үлкен. Мектеп қоршауының артында да бос орын бар. Әкімдіктің тиісті бөлімдеріне осы мәселені пысықтауды тапсырамын. Биыл балалар мен спорт алаңдары салынады, — деді Семей қаласының әкімі.
Тұрғындар кент жолдарын, әсіресе мектепке апаратын жолдарды ретке келтіруді сұрады. Жолаушылар көлігі және автомобиль жолдары бөліміне мектепке апаратын көшені тегістеу тапсырылды. Сонымен қатар, ағымдағы жылы Центральная көшесін Созидательная көшесінен бастап, соңғы аялдамаға дейін орташа жөндеуден өткізу жоспарланған. Оның ұзындығы — 1,3 шақырым. Сондай-ақ, Щорс, Созидательная көшелері мен «Бобровка» саяжай алабының ішіндегі автобус жүретін жолдарға жөндеу жұмыстары жүргізілетін болады.
Тұрғындар ауыз судың сапасына шағымданды. Кенттің айналасында құмды карьерлер бар, бұл жалпы экологияға қолайсыз әсер етеді. Жазда жер асты сулары тереңге кетіп, тұрғындар сусыз қалады.
Бобровка кентінің тұрғындарын орталықтандырылған сумен қамтамасыз ету мақсатында «ШҚО Семей қаласының Бобровка кентінде су құбыры желісінің құрылысы» ЖСҚ әзірленді. Сараптама қорытындысы алынды. Құрылыстың жалпы сметалық құны 303,400 млн. теңгені құрайды. ТКШ бөлімі құрылысқа ақшалай қаражат бөлу үшін облыстың энергетика және ТКШ басқармасына бюджеттік өтінім берді.
Кенттің тағы бір өткір мәселелерінің бірі — қатты тұрмыстық қалдықтарды шығару. Қоқыс шығаратын компаниялардың ешқайсысы осы кентке қызмет көрсетпейді. Бейберекет қоқыс үйінділері пайда болды. Осы жерде «Семей Тазалық» компаниясының өкілі ҚТҚ шығаруға дайын екенін мәлімдеді. Ол үшін тұрғындар қоқыс шығаруға жеке шарттар жасасуы қажет. Жергілікті учаскелік инспекторға қоқыс шығаратын компания өкілдерімен бірлесіп тұрғындармен шарт жасасу мәселесін пысықтау тапсырылды.
Көшені жарықтандыруға келетін болсақ, өткен жылы кенттің басты жолы — Созидательная көшесінде шамдар мен кабелдер ауыстырылған болатын.
Келесі жылы Семей қаласындағы көше жарығын жаңғырту аясында, Лесная, Тополиная көшелеріне, 1-ші тұйық көшеге, 3-ші тұйық көшеге, сондай-ақ Тополиная көшесінің кіре берісіне, орталық көшелер мен 6-шы тұйық көшеге жарық орнату жоспарланып отыр.
Семей қалалық ішкі саясат бөлімі
