Семей қаласының әкімі Бақытжан Байахметов «Треугольник» ауданына да барып қайтты. Бұл аудан екі теміржолдың арасында орналасқан жүзден аса үйлерді қамтиды. Мұнда үш мыңға жуық тұрғын тұрады.
Тұрғындардың айтуынша, соңғы рет қаланың бірінші басшысы мұнда 10 жыл бұрын болған. Оның өзінде тек су тасқыны мәселесі бойынша ғана жолыққан.
Мұндағы өткір мәселелердің бірі – ауданның шыға берісіндегі Бозтаев көшесі бойында бағдаршамның болмауы. Бұл кең даңғылдың арғы-бергі бетіне күн сайын жүздеген адам өтеді, оның ішінде балалар да бар. Көліктер жаяу жүргіншілер жолдарында тоқтамай, адамдарды қағып кеткен оқиғалар да тіркелген. Тұрғындар бағдаршам мен жылдамдықты шектеу белгісін орнатуды сұрады.
Жол белгілері мен бағдаршамдарды орнатуға байланысты барлық мәселелер жол полициясы қызметінің құзыретінде болғандықтан, қала әкімі бұл мәселені ішкі істер бөлімімен бірлесіп шешуге уәде берді. Сонымен қатар, қала басшысы аталған учаскеде жаяу жүргіншілер көпірін салу мәселесін қарастыруды тапсырды.
Жергілікті тұрғындар үшін темір жол арқылы өту де тағы бір өзекті мәселе болып отыр. Мұндағы кеңес заманында орнатылған бағдаршамның қызыл жарығы, пойыздар аталған аймақтан алыста болса да, жиі жанып тұрады. Нәтижесінде, көліктер бірнеше сағат бойы кептелісте тұрады. Адамдар уақыттарын жоғалтып, жұмысқа кешігіп келеді, сондай-ақ жедел жәрдем көліктері де кешігіп жетеді. Тұрғындардың өткелде «Тоқта» белгісін орнату туралы өтініштері қанағаттандырылатын болды.
Тұрғындар сол сияқты көше жолдарын жөндеп беруді сұрады. Мұнда бүгінгі күнге дейін ешқандай жол жұмыстары жүргізілмеген.
— Қала басшысы Семей қаласының көше жарықтандыру жүйесін жаңғырту жұмыстары аясында, алдағы екі айда Стаханов көшесі (ұзындығы 960 метр), Почтовая көшесі (ұзындығы 400 метр) және Островский көшесі (ұзындығы 360 метр) жарықтандырылатынын жеткізді.
Қала әкімі сонымен қатар, жолаушылар көлігі және автомобиль жолдары бөліміне Почтовая, Кәрменов, Победа, Акмола, Стаханов, Титов және Островский сияқты көшелерге құм-қиыршық тас қоспасын себе отырып грейдерлеу жұмыстарын жүргізу мүмкіндігін қарастыруды тапсырды.
«Треугольник» ауданында балалар және спорт алаңдары жоқ. Қала әкімі тұрғындармен бірге алаңдарды орнатуға ыңғайлы орындарды аралап көрді. Бірақ мұндағы жалғыз бос орын темір жолдардың жанында орналасқан екен, бұл балалар үшін қауіпті болуы мүмкін. Тұрғындармен ақылдаса келе жасанды жабыны бар қоршауы биік шағын футбол алаңын орнату туралы шешім қабылданды.
Сондай-ақ, сумен жабдықтау және еріген қар суына қатысты мәселелер де бар. Тұрғындардың айтуынша, жер астында көптеген сымдар мен кабельдер бар, олар жұмыс кезінде бұзылуы мүмкін.
Бақытжан Байахметов тиісті бөлімге жақын арада су құбыры мен кәріз жолдарының схемаларын қарастыруды тапсырды. Барлық жер жұмыстары оларды егжей-тегжейлі зерттеп, әрі қарайғы іс-қимылдардың жоспарын жасағаннан кейін жүзеге асырылатын болады.
А.АХМЕТҚАЛИЕВА,
«Семей таңы»
