Семей
Семей қаласы әкімі Бақытжан Байахметовтің шаһар шетіндегі аудандар тұрғындарымен кездесулері жалғасуда. Өткен аптада қала басшысы Пристань ауданына барып, жергілікті халықпен өзекті мәселелерді талқылады.
Пристань Ертіс өзенінің бойында орналаскан жеке аумақ. Мұнда Новая Лодочная, 2-ші Лодочная, Краевая сынды бірнеше үлкен көше бар. Осы көшелердің жарықтандырылмауы — аудандағы өзекті болып тұрған мәселелердің бірі. Енді бұл мәселе шешімін табатын болды. 2022-2023 жылдарға арналған көше жарықтандыру жүйесін жаңғырту жобасы аясында осы және басқа да көшелерді жарықтандыру жоспарланған.
Жолдарға келетін болсақ, ауданда 841 метрге созылатын жағалауды нығайту жұмыстары аяқталып келеді. Бұл жұмыстар ауыр жүк көліктері мен тракторлардың күшімен атқарылғандықтан аудандағы жекелеген жолдар қазіргі күні қанағаттанарлықсыз жағдайда.
Тұрғындар ауданның жолын жөндеу туралы өтініштерін білдірді. Айта кету керек, өткен жылы Подгорная көшесі, Матросский тұйық көшесі, Речников, Дачная көшелерінде жөндеу жұмыстары жүргізілген. Ендігі кезекте тұрғындардың тілектері бойынша, Краевая, Портовая, Новая Лодочная көшелері жөнделмек. Қала басшысы жолаушылар көлігі және автомобиль жолдары бөліміне, жағалауды бекіту жұмыстары аяқталғаннан кейін, аталған көше жолдарын құм-қиыршық тас қоспасын сеуіп, тегістеп шығуды тапсырды. Сондай-ақ өзен жағалауы нығайтылған аумақта бақылау камерасын орнату үшін техникалық мүмкіндіктер зерттелетін болды.
Пристань тұрғындары қоғамдық көліктің жұмысына шағымданды. Бұл ауданда
№ 8 бағыттағы қоғамдық көлік қызмет етеді, 7 автобус жүреді. Семей қаласының жолаушылар тасымалын басқару орталығымен бірлесіп, № 8 бағыттағы автобустардың қозғалысына мониторинг жүргізу тапсырылды. Бақытжан Кәкенқажыұлы қажет болған жағдайда автобустар санын көбейтіп, олардың қозғалысын жиілетуді тапсырды.
Аудан халқы балабақшаның да жетіспейтінін айтты. Мұнда 575 орындық үш мектепке дейінгі ұйым жұмыс істейді, бірақ шамамен 70-80 бала орынсыз қалады. Осы мәселеге орай, білім бөліміне жағдайды тағы бір рет талдай отырып, аумақтағы мектеп жасына дейінгі балалардың санын анықтау тапсырылды. Сонымен қатар Пристань ауданында балабақша салу қажеттілігін нақтылау керек.
Бүгінде Пристань тұрғындарының 93 пайызы орталықтандырылған сумен қамтамасыз етілген. Қалған тұрғындарды сумен қамтамасыз ету үшін жобалық-сметалық құжаттама әзірленіп, сараптамадан өтуге жіберілген. Оның қорытындысы алдағы мамыр айында дайындалады деп күтілуде.
Кездесу қорытындысы бойынша ауданда сонымен қатар жасанды жабыны бар футбол және спорт алаңын, балалар ойын алаңын орнатуға сметалық есеп дайындау және «Семей Водоканал» мекемесімен бірлесіп, Новая Лодочная, Краевая, Буксирная көшелерінде құдық орнату мүмкіндігін қарастыру тапсырылды.
Анар АХМЕТҚАЛИЕВА,
«Семей таңы»
