Семей қаласының әкімі Бақытжан Байахметов Кирпичный кентінің тұрғындарымен кездесті. Мұнда 3 мыңнан астам халық тұрады.
Кездесуде тұрғындар қала көлемінде атқарылып жатқан ауқымды жұмыстар жайлы газет пен теледидар арқылы біліп отыратындарын айтып, әкімге алғыс білдірді. Тұрғындар өз кенттеріндегі мәселелер де шешімін табатынына сенімді.
Бастамашыл топ мүшелері қала басшысына бірқатар мәселелерді жеткізді. Ақсақалдар алқасының төрағасы Құсман Жұмабековтің айтуынша, Кирпичный кенті Алматы тас жолы жағынан қалаға кіреберіс қақпа іспеттес. Сондықтан да кенттің сыртқы келбеті, жолдары, көшелердің абаттандырылуы жақсы деңгейде болуы керек деп санайды.
Кенттегі басты проблемалардың бірі – мұндағы негізгі көше 9-шы Кирпичнаяда жарық жоқ. Қала әкімі осы мәселеге байланысты, ТКШ бөліміне 5 наурызға дейін көшені жарықтандыру бойынша жоспарланған жұмыстар кестесін дайындап, ұсынуды тапсырды.
— Осы көшені жарықтандыру туралы сіздердің өтініштеріңізден басқа, биыл Семей қаласындағы көше жарығын жаңғырту жобасы аясында осы жердегі Кирпичный завод көшесі мен Лебаев көшесіне жарық орнату жоспарланып отыр. Кентте көшелер аз, биыл сіздердің тілектеріңізді орындай аламыз деп ойлаймын, — деді Бақытжан Байахметов.
Кенттің басты жолының жағдайын ескере отырып, қала басшысы жолаушылар көлігі және автомобиль жолдары бөліміне орташа жөндеу жүргізу үшін сметалық есеп дайындауға тапсырма берді. Осы жобаны іске асыруға байланысты ұсыныстар ағымдағы жылдың 15 наурызына дейінгі мерзімде дайындалуы тиіс.
Кирпичный тұрғындары, автокөліктер тәулік бойы өтіп жататын Алматы тас жолының бойында бағдаршам мен жаяу жүргіншілер жолы жоқ болғандықтан, балалары үшін алаңдайтындарын жеткізді.
— 15-ші наурызға дейін жол полициясы және техникалық инспекция бөлімдері бірлесіп, келісім бойынша Омбы-Майқапшағай жолының учаскесіне «Жаяу жүргіншілер жолы» белгісін орнату үшін бірқатар зерттеулер жүргізу қажет, — деп тапсырма берді Семей қаласының әкімі.
Тұрғындар сондай-ақ балалар ойын алаңын орнатуды сұрады, ол үшін бос орын да бар екенін айтып өтті. Бос тұрған жер жол бойында орналасқан және тұрғындардың айтуынша, қазіргі заманға сай алаң орнатылатын болса, кенттің көркін ашып тұрар еді.
— Мен кентте тек балалар ғана емес, жалпы тұрғындар да көп екенін көріп тұрмын. Сондықтан да тек балалар алаңы ғана емес, жасанды жабыны бар футбол алаңы да қажет деп ойлаймын. Спорт алаңын да орнатамыз. Балалар емін-еркін ойнап, жасөспірімдер футболмен шұғылданатын болады, ал спорттық тренажерлер барлық тұрғындарға пайдалы болады, — деді Бақытжан Байахметов.
Кездесу барысында тиісті бөлімге сметалық есепті дайындап, бюджетті жақын арада нақтылау кезінде қажетті қаражатты бөлуге бюджеттік өтінім беру тапсырылды.
Сонымен қатар тұрғындардың өтініштері мен тілектері бойынша кенттегі түрлі қоқыс үйінділері шығарарылатын болды. Учаскелік инспекторлармен және қоқыс шығаратын компаниялардың өкілдерімен бірлесіп, қатты тұрмыстық қалдықтарды шығаруға шарт жасасу үшін тұрғындармен тұрақты кездесулер ұйымдастырылатын болады.
Сондай-ақ, 5 наурызға дейін қаңғыбас иттердің мәселесі де шешілмек.
Анар АХМЕТҚАЛИЕВА,
«Семей таңы»
