Қаперде жүрер қатер
Семей қаласы әкімдігінің отырысында қаланың су тасқыны кезеңіне дайындығы қаралды.
Қазіргі күні қала көлемінде 15 учаскені су басу қаупі бар, 631 тұрғын үй орналасқан бұл аумақтарда 2364 адам тұрып жатыр.
Бобровка кенті мен Бейбітшілік аралынан басқа 13 учаскеде (Шығыс кенті, Восход, Жоламан, Мирный, Степной, Лодочная ауданы, Затон, 1-ші шағын аудан, Дальний, Юность, Новостройка, Көкентау және Мұқыр ауылдары) су бұру арналарын тазарту, су өткізу құбырларының диаметрін ұлғайту, жағалауды, үйінді бөгетті нығайту және тағы басқа жұмыстардың нәтижесінде су басу қаупі барынша азайтылды.
Су тасқынына қарсы іс-шаралар аясында, қалада су басуға бейім 57 көше анықталып, шамамен 47 101 текше метр қар шығарылған. Бұл жұмыстар қала көлемінде әлі де жалғасуда.
Семей өңірі аумағындағы автомобиль жолдарында (республикалық, облыстық және жергілікті жолдарды қоса алғанда) 209 көпір, 524 су өткізу құрылыстары бар. Ауылдық әкімдіктерге және тиісті ұйымдарға аталған су өткізу құрылыстарын, сондай-ақ арық жүйесін, өзен арналарын қар мен мұздан тазарту жөнінде хаттар жіберілген.
Семей қаласының жол қызметтері су тасқыны кезеңін қауіпсіз өткізу мақсатында су өткізу құрылыстарын қар мен мұздан тазарту бойынша іс-шаралар жоспарын әзірледі. Жергілікті жерлерде тәулік бойы кезекшілік жүргізетін жұмыс бригадалары құрылған. Қаланың арық жүйесін күн сайын 25 адам және 5 бірлік арнайы техника тазалайды. ТЖМ әскери қызметшілерін тарта отырып, Мирный кенті, Подхозная көшесі, Дальний ауданындағы саяжай алаптарында арық жүйесі мұздан тазартылды. Шығыс кентінің «Пожарная Согра» саяжай массивінде де тасқынның алдын алу жұмыстары жүргізілді.
Авариялық-құтқару және кезек күттірмейтін жұмыстарды жүргізу үшін 2022 жылға арнайы бағдарлама бойынша жалпы сомасы 20077,8 мың теңге қаражат бөлінген.
Бүгінде тұрғын үйлерді су басудан және Бейбітшілік аралындағы Ертіс өзені жағалауындағы учаскелерді қарқынды шаюдан сақтау үшін Мирный, Шығыс кенттерінде және Пристань ауданында жалпы ұзындығы 2566 метр болатын Ертіс өзенінің жағалауын нығайту жобасы іске асырылуда. Жұмыстарды аяқтау мерзімі үстіміздегі жылдың 1 мамырына дейін ұзартылды.
Қазіргі күні әкімдік тарапынан мердігерлік ұйымдардың күшімен қала көлемінде арықтарды қоқыстар мен шөптерден тазарту, түбін тереңдету, су құбырларын ыстық сумен жуу сынды тағы басқа да су тасқынына қарсы шаралар қарқынды жүргізіліп жатыр.
«СТ» — ақпарат
