Құсайынова Алмагүл Шүренқызы Тарбағатай ауданындағы Комсомол ауылында қарапайым жұмысшы отбасында дүниеге келген.
Алмагүл Шүренқызы Өскемен қаласындағы педагогикалық училищені және Жансүгіров атындағы Талдықорған педагогикалық институтын үздік бітіріп, еңбек жолын Ақжардағы «Балауса» балабақшасында бастады. Кейін осы мекеменің меңгерушісі болып тағайындалып, осы күнге дейін еңбек етіп келеді.
Кейіпкеріміз елдің қоғамдық және саяси өміріне белсене атсалысып келеді. 40 жылдан астам уақыттан бері Ақжар ауылдық округтік әйелдер кеңесінің төрайымы. Қандай да бір маңызды істің басы — қасынан табылып, құрақ ұшып жүретін жанды ауданымызда танымайтын адам жоқ-ау! Бала тәрбиесінің ауыр жүгін арқалаған Алмагүл Шүренқызы ішкі жан дүниесі сыртқы келбетіне сай аса мейірімді, инабатты жан. Білімді, жаңашыл, өз ісіне мығым басшының жүріс-тұрысы, өзіне деген сенімділігі өзгелерге үлгі боларлықтай. Ақыл сұрап алдына келген әрбір ананың көңіл түкпіріне үңіліп, әр сөзін жүрегімен қабылдап, сабырға шақырып, дұрыс жол сілтеп отыратын оны балабақшаның ғана емес, үлкен тәрбие мектебінің басшысы деуге болады.
Өнерге де жақын Алмагүл Шүренқызының өзінің әдемі дауысымен тыңдаушысын баурап алатын қасиеті бар. Би билеп, домбыра мен баянда да ойнайды, өлең де жазады.
Ақжар ауылындағы көркімен көз тартатын «Балауса-Балғын» бөбекжай бақшасы бүгінгі күні аудандағы үздік мектепке дейінгі мекемеге айналған. Алмагүл Шүренқызы басқарып отырған балабақша педагогтері аудандық, облыстық, республикалық сайыстар мен байқауларға қатысып, жүлделі орындарға ие болып келеді. Балабақшада бүгінгі күні 63 адам еңбек етеді. 201 бала тәрбие алуда. Тәрбие ісінде көптеген жаңашылдықтар енгізілген.
Қажырлы қайратымен, ұйымдастыру қабілетімен ауыл халқының құрметіне бөленіп жүрген Алмагүл Шүренқызының еңбегі еленбей қалған жоқ. Іскер басшы ҚР Білім министрлігінің Құрмет грамотасымен, Елбасының алғыс хатымен марапатталған. 2014 жылы халықаралық Ұлттық Бизнес рейтингтер одағының «Сала көшбасшысы-2014» сертификатын иеленді. «Ерен еңбегі үшін» медалін, «Тарбағатайдың Алтын Анасы» төсбелгісін де омырауына таққан.
Алмагүл Шүренқызы Уәлбек Смағзамұлымен отбасын құрып, төрт баланы дүниеге әкелді, бүгінде олардан 7 немере сүйіп отыр. 8 Наурыз мерекесі қарсаңында білікті басшы, аяулы ана, ардақты әже Алмагүл Шүренқызын құттықтап, деніне саулық, отбасына амандық тілейміз, алдағы уақыттарда да табыстарға жете беріңіз.
Гаухар ШАҒИЕВА,
«Балауса-Балғын» бөбекжай-бақшасының тәрбиешісі,
Ақжар ауылы, Тарбағатай ауданы
