Биыл су шығыны 458 млн млн текше метрге азайтылады. Бұл туралы ҚР Экология, геология және табиғи ресурстар вице-министрі Серік Қожаниязов айтты.
— Биыл апатты су қоймалары мен гидротехникалық құрылыстарды қайта жаңарту жұмыстары жалғасады. Биылғы жылдың соңына дейін Шығыс Қазақстан облысында 3 апатты су қоймасы қалпына келтіріледі. 9 жаңа су қоймасын салу аясында 2025 жылға дейін Қызылорда облысында Қараөзек су қоймасының құрылысы басталады және 5 жобалау-сметалық құжаттама әзірлеу жұмыстары аяқталады. Республикалық бюджет есебінен және халықаралық қаржы ұйымдарының қарыздары есебінен 1 720 шақырым магистральдық және шаруашылықаралық каналдар қайта жаңартылады. Бұл 80 мың гектарды қалпына келтіруге және 24 мың гектар суармалы жерді сумен қамтамасыз етуді жақсартуға мүмкіндік береді, — деді министрліктің алқа мәжілісінде.
Сондай-ақ вице-министр каналдардағы шамамен 14 мың гидротехникалық құрылыс қалпына келтіріліп, 676 шақырым коллектор жаңғыртылатын болады. 23 канал цифрландырылды.
— Жоғарыда аталған іс-шараларды іске асыру нәтижесінде жыл сайынғы су шығыны 458 млн текше метрге азайтылады. Сондай-ақ, Қарағанды, Қызылорда және Солтүстік Қазақстан облыстарында ұзындығы 194 шақырым топтық су құбырларын салу мен қайта жаңартудың бес жобасы бойынша жұмыс жүргізілуде. Бұл халқының саны 300 мың адамнан асатын 94 ауылдық елді мекенді сумен қамтамасыз етуді жақсартуға мүмкіндік береді, — деді Серік Қожаниязов.
Азамат ЕРСАЙЫН,
«Семей таңы»
