Облыс жаңалығы
Облыс әкімі Даниал Ахметов жұмыс сапарымен Тарбағатай ауданына барып, халықпен кездесті. Кездесу барысында аймақ басшысы тұрғындармен бірге бірқатар өзекті мәселелерді талқылады.
Даниал Кенжетайұлы «Бір қабатты Шығыс», «Шекара маңындағы аумақтар мен бұрынғы аудан орталықтарын дамыту», «Ауыл – Ел бесігі» бағдарламалары бірінші кезекте халықтың өмір сүру сапасын жақсартуға бағытталуы қажет екенін атап өтті.
Аймақ басшысының айтуынша, аудан аумағында маңызды көлік артериясы — «Қарағанды — Аягөз — Боғас» республикалық автожолының құрылысы жалғасуда. Аудандағы 60 елді мекеннің 53-і ауыз сумен қамтылған, жұмыстар әлі де жалғасуда. Сондай-ақ көше жарығын орнату және тарбағатайлықтарды тұрақты әрі қолжетімді интернетпен қамтамасыз ету мәселесі шешілуде. Ауданда 49 мектеп және 20 балабақша жұмыс істейді, қажетті білім беру нысандарын жөндеуге және салуға қаражат бөлінген.
Ақжар мен Ақсуаттағы ауруханалар барлық қажетті жабдықтармен қамтамасыз етілген, ал аудандық орталық аурухана PACS жасанды интеллект жүйесіне қосылған.
«Ауыл шаруашылығына субсидиялар 2,5 миллиард теңгені құрады, бұл өткен жылмен салыстырғанда әлдеқайда көп. Аудан тұрғындары мал шаруашылығымен табысты айналысып келеді. Ветеринарлық зертхана салу туралы ұсыныс айтылды, біз оны міндетті түрде қарастырамыз. Сонымен қатар мен ветеринарлық және зоотехникалық салалар мамандықтары бойынша мектеп түлектеріне гранттар бөлуді тапсырдым. Ауданда археология саласындағы ғылыми-зерттеу жұмыстарының бағдарламасы да жалғасатын болады. «Елеке сазы» қорымынан табылған артефактілер Ұлыбританиядағы «Ұлы Дала алтыны» көрмесінің бір бөлігі болды. Экспозиция 2021 жылы әлемдегі ең үздік бес көрменің қатарына кірді»,- деп жазды облыс басшысы әлеуметтік желідегі жеке парақшасында.
Сапар барысында Даниал Ахметов сондай-ақ құрылысы жүріп жатқан дене шынықтыру-сауықтыру кешеніне барды. Нысанда жекпе-жек залдары, үлкен спорт залы және ұзындығы 25 метр бассейн болады. Барлық жұмыстар кесте бойынша жүргізілуде және 2022 жылдың қыркүйегінде нысан пайдалануға беріледі.
Хамза СӘТИЕВ,
«Семей таңы»
