Баспасөз мәслихаты
Семейдегі Перинаталды орталық 190 төсекке арналған. Мұнда жоғары сапалы заманауи жабдықтармен жабдықталған балаларды оңалту орталығы және ерте араласу орталығы ашылды.
Семейдегі перинаталды қызметтің жұмысы туралы Семей қаласының аймақтық коммуникациялар қызметінде өткен баспасөз-конференциясында Семей қаласының перинаталды орталығының директоры Архат Дайырбаев айтып берді.
— Бізде қала орталығында жеке тұрған екі ғимарат жұмыс істейді. Біз мұнда ана мен балаға көмек көрсетеміз. Сол жағалаудағы бұрынғы № 2 перзентханада біздің емхана жұмыс істеп тұр. Биылғы жылдан бастап балаларды оңалту орталығы жұмыс істейді, бұл жерде жаңа туған нәрестеден бастап 18 жасқа дейінгі балалар оңалтудан өте алады. Орталық екі бөлімшеден тұрады: ерте араласу орталығы – жаңа туған және үш жасқа дейінгі балаларға арналған; балаларды оңалту орталығы – үш жастан 18 жасқа дейінгі балаларға арналған, – деді Архат Дайырбеков.
Сонымен қатар баспасөз конференциясы барысында спикер балаларды медициналық оңалтудан өткізу мемлекеттік тапсырыс шеңберінде, яғни тегін жүргізілетінін атап өтті. Орталыққа ай сайын жүзден астам бала келеді екен, олардың қатарында мерзімінен бұрын туған балалар, туа біткен ақаулары бар және психикалық дамуы бұзылған балалар да бар.
— Ақпан айында сол жағалаудағы ғимаратта бізде бірінші рет катамнез бөлімшесі ашылды. Бұл жерде емханаларда балаларға арналған бөлек орынның жоқтығына байланысты, мерзімінен бұрын дүниеге келген және ауыр босану нәтижесінде туған балалар қабылданады. Сондықтан біз осы қызметті өз мойнымызға аламыз. Аналар емханаларынан жолдамалар алып, бізде толық тексерілуден өте алады, – деп түйіндеді сөзін Архат Дайырбеков.
«СТ» — ақпарат
