Халық қалаулылары ел ішінде
Депутаттардың ауылдық округтер тұрғындарымен кездесулері жалғасуда. Жақында облыстық мәслихаттың депутаты Мұхит Тұмабаев, қалалық мәслихат депутаттары — Гүлжанат Рахатқызы мен Камилия Исмаилова Приречный ауылдық округінде болып, сайлаушылардың талап-тілектерін тыңдап қайтты.
Жиын барысында ауыл тұрғыны фельдшерлік пункттің іске қосылуы туралы мәселе қозғады. Жергілікті әкімшіліктің қарамағына берілген фельдшерлік пункттің ғимаратына жөндеу жұмыстары қажет екендігі айтылды.
Тұрғындар сонымен қатар 2020 жылдың басынан бері тоқтап тұрған автобус қатынасына қатысты мәселені көтеріп, ретке келтіруді сұрады. Приречный ауылында дәріхана мен банкоматтың жоқтығы да тұрғындарға қиындық туғызып отыр.
Жиында көтерілген мәселелерді шешуге депутаттар тарапынан қолдан келген көмек көрсетілетінін айтқан облыстық мәслихаттың депутаты Мұхит Тұмабаев автобус мәселесі шешімін табатынын, ал банкомат орнатуға қызығушылық танытып отырған кәсіпкерлер бар екендігін жеткізді. Сонымен қатар халық қалаулысы дәріхана тұрғындар үшін бірінші қажеттіліктердің бірі екенін атап өтіп, бұл мәселенің де шешу жолдары қарастырылатынын айтты.
«СТ» — ақпарат
