Облыс жаңалығы
Өткен аптада облыс әкімі Үржар әуежайының құрылысын аяқтау және қайта жаңарту мәселесі жөнінде кеңес өткізді.
Аймақ басшысы атап өткендей, бүгінгі күнгі бұл жоба «Жұмыспен қамтудың жол картасы» бағдарламасы аясында жүзеге асырылуда.
— Үржар ауданында біздің туристік кластер, яғни Шығыс Қазақстанның інжу-маржаны-Алакөл көлі бар. Сондықтан маусымның басында әуежай туристерді қабылдай алуы өте маңызды. Бұл — өңірдегі осы саланы дамытудағы үлкен қадам. Қазір басты кезеңдердің бірі – ұшақтарды түнгі уақытта қабылдауға мүмкіндік беретін заманауи жарық-дабыл жабдығын орнату. Мен сараптамалық компанияларды шақыруды тапсырдым, олар қондырғының дұрыс және ауытқуларсыз жасалғанына көз жеткізуі шарт. Ұшулар мен жолаушылардың қауіпсіздігі нақ осыған байланысты. Ұшу-қону жолағындағы жұмыстар аяқталуда, оның ені 35 метрге, ал ұзындығы 2,7 километрге дейін ұлғайды, — деп атап өтті аймақ басшысы Даниал Кенжетайұлы.
Айта кетер болсақ, жаңғырту жұмыстарынан кейін Үржар ауылының әуежайы шағын авиацияның ғана емес, сонымен қатар Embraer, Bombardier класты және басқа да алып ұшақтарды қабылдай алады. Бұл Алакөл көлінің жағалауындағы туристер ағынын арттыруға мүмкіндік береді.
Сондай-ақ облыс әкімі жаңғырту жұмыстары аяқталғаннан кейін Үржар әуежайы ғимаратының өткізу қабілеті сағатына 150 жолаушыға дейін артатынын да атап өтті.
ШҚО экономика және бюджеттік жоспарлау басқармасының басшысы Сәуле Ұлақованың сөзіне сүйенсек, шекаралық елді мекендердің инфрақұрылымын дамытуға және экономикалық потенциалын кеңейту шараларына 74 млн теңге бөлу жоспарланған. Соның ішінде Үржар ауылындағы әуежайдың терминалын қайта құру жобасы бойынша сметалық құжаттамаларды әзірлеуге – 44 млн теңге, Алакөл көлінің жағалауындағы көшелерге орташа жөндеу жүргізуге 30 млн теңге бөлініп отыр.
Өз тілшіміз
