Қалалық әкімдікте
Өткен аптада Семей қаласының әкімі Бақытжан Байахметов кезекті рет жеке қабылдау өткізді.
Шаһар басшысының қабылдауына жазылған азаматтардың бірі Әсем Мұқышева үйінің техникалық себептерге байланысты жарық көзіне қосылмағанын айтып, көмек сұрап келіпті. Қаладағы Азат тұйық көшесінде тұратын ол қазіргі таңда электр қуатын көршілерінен алуға мәжбүр болып отыр. Қабылдау барысында айтылғандай, бұл мәселе тек шілде айында шешіледі. Қазіргі күні РСУ ауданында құрылыс бөлімімен «Семстройпроект» ЖШС тарапынан жаңа жобалау-сметалық құжаттама әзірленуде. Мемлекеттік сараптамаға құжаттар дайындалуда.
Қала басшысына өтінішпен жүгінген келесі тұрғын Сәния Сағитова мүмкіндігі шектеулі ұлын тәрбиелеп отыр және қазіргі таңда, өз баспанасы жоқ. Сәния Сағитова 2016 жылдың қыркүйегінен бастап «Жасына байланысты зейнеткерлер» санаты бойынша тұрғын үй кезегінде тұрған. Алайда жүргізілген түгендеу жұмыстары нәтижесінде Сәния Сағитованың Нұр-Сұлтан қаласына тұрақты тұруға көшіп кеткені анықталды. Осыған байланысты, тұрғын үй комиссиясының 03.03.2021 жылғы шешімімен кезектен шығарылған. Қазіргі таңда, өткен жылдың 8 желтоқсанынан бастап, «Жасына байланысты зейнеткерлер» санаты бойынша кезекте тұр, кезек нөмірі 4385. Қабылдау барысында тұрғын үй инспекциясы бөліміне заңнамаға сәйкес Сәния Сағитованың құжаттарын тағы бір рет қарап шығуға тапсырма берілді.
Қабылдауда болған Сағдат Воложаев пен Марина Смольникова Степной кенті мен Приречное ауылындағы автобус бағыттарына қатысты мәселені шешіп беруді сұрады. Степной кентіне № 6 және № 14 қоғамдық көліктері – жалпы саны 15 автобус қызмет көрсетеді. Олардың айтуынша, автобустар таңертең кеш шығады және кешке жұмысты ерте аяқтайды.
Бұл мәселеге орай, қала әкімінің орынбасары мен жолаушылар көлігі және автомобиль жолдары бөліміне Степной кентіне қатынайтын автобустардың қозғалыс кестесін бақылауға алу тапсырылды. Сондай-ақ Новобаженово, Приречное ауылдық округтері мен Шүлбі кентінің әкімдеріне жолаушылар санына мониторинг жүргізіп, қажет болған жағдайда, жаңа автобус бағытын ұйымдастыру мүмкіндігін қарастыру тапсырылды.
Ал 2020 жылдың қазан айынан бастап атаулы әлеуметтік көмек алып отырған Арман Мамырбек есімді тұрғын екі жасар ұлын жалғыз тәрбиелеп отыр. Ағымдағы тоқсанда оған АӘК 162 114 теңге (айына 54 038 теңге) мөлшерінде тағайындалды. Қабылдауда ол балалар бассейніне және «Арена» мәдени-спорт кешеніне тегін абонементтер, сондай-ақ «Барлық-Арасан» шипажайына тегін жолдама сұрады. Арман Мамырбек аталған шипажайдың орнына ұлын «Тоқтамыс» балалар дамыту орталығына тегін апаратын болды. Өйткені мемлекеттік органдардан «Барлық – Арасан» шипажайына тегін жолдамалар қарастырылмаған. Сонымен қатар спорт бөліміне қаладағы спорт ғимараттарының біріне бассейнге бару мүмкіндігін қарастыру тапсырылды.
Новобаженово тұрғыны, көп балалы ана – Жібек Арғынова Семей қаласынан баспана сұрады. Алайда оның өтініші қанағаттандырылмады, себебі көп балалы ана қалада тұрмайды және ауылда жекеменшігі бар. Ал тұрғылықты жері бойынша ауылдық округтегі тұрғын үйді кеңейтуге кезекке тұруға келіспеді. Жібек Арғыноваға оның өтініші бойынша толық түсінік берілді.
Бұл күні қала әкіміне сонымен қатар «Semey Bus» ЖШС және «Семей» автобус паркі» ЖШС-нің бұрынғы қызметкерлері де жүгінді. Олар аталған кәсіпорындардан зейнетақы аударымдары мен медициналық сақтандыру бойынша өтемақыларын талап етіп отыр. Қазіргі таңда кәсіпорындардың бұрынғы қызметкерлерінің істері сот орындаушыларының бақылауында. Бақытжан Кәкенқажыұлы сот орындаушыларына апта сайын өтемақы төлеу барысы туралы хабарлап отыруды тапсырды.
Қазіргі таңда кәсіпорындардың мүлкін тізімдеу, ақаулықтарын табу, бағалау жұмыстары жүргізіліп жатыр, содан кейін барлық материалдар сотқа жіберіледі. Тиісті төлемдерге тек сот шешімі негізінде қол жеткізуге болады.
Семей қаласының ішкі саясат бөлімі
