Халық қалаулылары ел ішінде
Өткен аптада облыстық мәслихат депутаты — Альбина Ахметова, қалалық мәслихат депутаттары — Наталья Перцева мен Марат Макишев Новобаженово ауылдық округіне барып, тұрғындармен кездесу өткізді.
Кездесу барысында тұрғындар өздерін толғандырып жүрген сауалдарын қойып, түйткілді мәселелерін жеткізді. «Қазпошта» бөлімшесі мен дәріхана ашу, Семей қаласы мен Бұлақ, Баженово, Новобаженово ауылдары арасындағы автобус қатынасын қалпына келтіру, ауылдық округке жедел жәрдем көлігін бөлу – жиында тұрғындар тарапынан осындай ұсыныстар айтылды.
Кездесуде айтылғандай, ауылда «Қазпошта» филиалы 2019 жылдың қыркүйек айына дейін жұмыс істеген. Автобус қызметі 2020 жылы тоқтатылған. «Гармония» емханасының жеке көлігі бар болғанымен, жедел медициналық көмек көрсету қажет болған жағдайда жедел жәрдем көлігі Семей қаласынан шақырылады.
Сонымен қатар ауылда банкоматтың жоқтығы да айтылды. Депутаттар бұл мәселеге орай жауап бере отырып, әкімдік мамандары осы бағытта жұмыстар жүргізіп жатқанын, банк басшыларына хаттар жіберілгенін жеткізді.
«СТ» — ақпарат
